› 選擇地區
三藩市
紐約
洛杉磯
其他美國地區
香港 台灣 北美
 
2016年05月09日

中環在線:冇興趣做生意
蔡繼有孫女尋演藝夢 - 李華華

上月協青社喺沙田大會堂舉行一場街舞劇,大家多數提到華置(127)主席劉鳴煒為演出而苦練跳舞,其實除咗佢呢位富二代之外,有位富三代亦參與其中。佢就係新華滙富金融(188)主席蔡冠深嘅女兒蔡頌思(Jocelyn)。22歲、樣子甜美嘅Jocelyn無意繼承家族生意,反而決定向演藝事業發展。

相關新聞:中環在線——爸爸蔡冠深:男人靠唔住

不會為入行選港姐

蔡冠深屬於低調富豪,爸爸係已故「海產大王」蔡繼有,家長一定聽過名牌私校保良局蔡繼有學校。蔡氏家族生意種類繁多,涉及海產、飲食、地產、金融等,大部份冇上市,主要由蔡冠深打理。
蔡冠深有四子一女,長子喺家族公司新華集團工作咗幾年,二女Jocelyn舊年喺中大畢業,今年2月加入新華滙富公關部工作。
呢位富家女同好多大學畢業生一樣,「畢業後好迷惘,返工又唔知做乜!」Jocelyn坦言,爸爸想佢幫手做生意,但佢喜歡舞台表演,自小學習不同舞蹈,包括芭蕾、hiphop、中國舞等,喺公司工作幾個月,更肯定自己冇興趣做生意。佢唔理父母嘅意見,報讀演藝學院,今年9月開學。
佢無奈咁話:「爸爸覺得再讀4年演藝,浪費時間」,但佢希望透過演藝,接觸本地劇團,幫到自己發展。呢段時間,佢一邊返工,一邊爭取各類演出機會,兩、三個月前,佢知道協青社籌備街舞劇,就透過媽媽嘅人際網絡,面試後得以中途加入,排練一個月後上台演出。早前佢亦有去參與電影試鏡,總之見步行步。佢肯定唔會為入演藝圈而選港姐。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載