› 選擇地區
三藩市
紐約
洛杉磯
其他美國地區
香港 台灣 北美
 
2016年05月18日

中環在線:小超爆超人未病好
要休息多兩三日 或無緣見張德江 - 李華華

李嘉誠食咗其他食物,再出現腸胃問題。

負責港澳事務嘅全國人大委員長張德江噚日起訪港3日,唔少政商界人士都想見佢一面,偏偏係呢個時候,說話舉足輕重嘅「超人」李嘉誠竟然腸胃炎未病好,「小超人」李澤鉅噚日仲透過《星島日報》公告天下,指爸爸需要休息多兩、三日。咁咪可能同張德江緣慳一面囉。
其實每個人都會病,何況李嘉誠都88歲,只不過,超人多年來絕少缺席集團股東會,上周五因聲沙、腸胃炎而缺席長和(001)與長實地產(1113)股東會已經令到好多小股東失望兼擔心。

食咗其他食物再病過

李澤鉅當日已經做好期望管理,指超人病只係小事,人人都有機會病,又形容超人係集團「首席員工」,相信佢休息幾日,就可以重投工作。
而李澤鉅果然料事如神,長實「樓神」趙國雄本周一見傳媒時透露,超人已病癒返工,正當大家以為超人可以最佳狀態見張德江,《星島日報》網站噚日忽然引述李澤鉅,指超人早前患腸胃炎,本應留家休息,並戒口食粥水,但超人周一忍唔住返公司「打了個白鴿轉」,又食咗其他食物,於是再出現腸胃問題。
李澤鉅仲話,超人食咗好多餐粥水,想食其他嘢,其實都好正常。佢估計,爸爸需要多休息兩、三日。
至於超人食咗乜,搞到又病過呢?李澤鉅就冇詳談,只係話多謝大家關心喎。長和公關大員噚晚補充話,超人冇大問題,只係需要在家休息,至於係咪無法出席張德江訪港活動,佢就話,唔清楚超人嘅私人行程。
不過又咁講,超人要見領導人,應該大把機會喇。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載