› 選擇地區
三藩市
紐約
洛杉磯
其他美國地區
香港 台灣 北美
 
2016年05月24日

金手指:煙草公司發功 - 孫柏文

由上世紀中創立標普500指數,500隻創指數股中,到今日表現最好嗰隻係賣萬寶路嘅Altria。 資料圖片

「冇理由唔俾政府管死,沽爆佢!」孫柏文記得當年90年代,股票行嘅唐哥同我講佢嘅客,點解大量拋空花旗國上市嘅煙草股。
結果係點?冇錯,全球管煙草嘅措施真係越來越多,不過煙草公司嘅股價就節節上升。其實,由上世紀中創立標普500指數,500隻創指數股中,到今日表現最好嗰隻,就係賣萬寶路嘅Altria。
點解會咁?因為當一個行業越多監管,能頂得順嘅就只得大企業。呢個連佢哋啲高層都知,所以近十年,佢哋透過啲「唔使選」嘅政策制訂機構,例如歐盟、香港AO等,歡迎監管。
不過,連煙草公司都不能避過科技嘅洪流。電子煙嘅出現,對煙草公司嘅威脅,我見到身邊朋友嘅習慣有所改變,直情係有如當年napster、BT對唱片舖嗰隻。所以,煙草公司想借政府之力,殺咗佢。盤棋嘅捉法,就係要夾友好機構放煙幕,牽傳媒,引C9出力。

喺香港,不難覺得開始發功,因為近日一段又一段新聞打電子煙,淨係本報都唔少。事實係點?英國嘅「醫管局」NHS,已經係勸啲人轉食電子煙,甚至會免費派發,因安全過食煙,不過又例如本報等傳媒喺香港太有影響力,所以,香港全面禁電子煙指日可待。
最可惜係乜?就係如果啲人大規模轉食電子煙,真係減少患癌,少啲人死。喺香港禁,就會有好多唔使死嘅人,為咗煙草商同佢哋盟友,枉死。不過,救人唔係吸煙與健康委員會、高永文局長、健康版記者、煙草公司嘅目標,有奶水飲、有稿交先至係。真係想一注獨贏買Altria。

孫柏文
獨立股評人
http://www.facebook.com/shuen
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載