蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年05月30日
馬上成為壹會員

笑到最後:
兩個買樓的重大時機 - 高明

幾時係買樓時機,其實大家都知道,只係到咗要買樓嘅時候,冇咁嘅能力。 資料圖片

幾時係買樓時機,其實大家都知道,只係到咗要買樓嘅時候,冇咁嘅能力。因為香港樓市重重複複咗咁多個周期,最後都可以打番上嚟,好多人都知咩位抵買。舉個例子,以高明呢一輩嘅人,經歷過金融風暴同沙士,亦都見證過QE後樓市大牛市,再跌番落嗰啲水平,一睇就知,係抵買。
如果係高明父母一輩經歷過更多個樓市周期,其實,沙士後已知抵買,只係平還平,升就要啲誘因,當年都冇可能知道QE可以令樓市升到咁誇張,亦係呢個原因,唔少人喺2007年打後已經陸續沽樓。

公務員凍薪訊號

至於點解明知抵買都買唔到,最大原因係冇錢,失業率高,工都冇得做,有錢做首期,都未必有錢供。到時呢一刻會相當明顯,其中一個重大訊號就係公務員凍薪。
政府人工從來係有加冇減,好景時要提供優差引人入行,逆境時又要加薪提高士氣。今年就係典型例子,年頭所有分析都話今年會轉差,果然自由行消費力轉弱,零售、舖租都差,連帶住宅樓今年都步入跌浪,而股市今年都沉過底。
喺咁嘅情況下,今年薪酬趨勢調查委員會仲建議為公務員加薪3%至4.68%。公務員加薪係唔理普通差嘅經濟環境,只係有極端惡劣情況。
例如政府有財赤,加上個市好差,先會勉為其難凍薪平息民憤,想減都難。
而見到公務員凍薪嗰一刻買樓,只要香港唔墮落成為中國其中一個城市,肯坐贏面係99%,最後1%只係冇誘因觸發升浪。

另一原因亦都係嚟自政府,就係減辣。政府決策一定慢過常識需要,例如,辣招係控制需求,當樓市轉勢,跌落去冇人接貨,下滑速度會過急,應該喺轉勢前減辣,唔少人,包括高明,喺舊年中樓市轉勢前已叫政府減辣,等樓市有秩序下降。
但政府唔會咁做,一定要確認跌到滿目瘡痍先會減辣。咁做嘅好處係:政府減辣就係一盞明燈,如果減咗BSD買家印花稅,即係想引返啲中國人入嚟買。
如果減DSD雙倍印花稅同埋SSD額外印花稅,即係中國都冇晒購買力,想引返本地人入市;如果推首次置業貸款,即係連本地人未來收入都預先揸乾。
樓市同股市唔同,股市見底要事後先知,樓市低迷有太多特徵,至少抵買時政府會話你知,但到咗嗰時,大部份人都買唔起。所以唯一逆周期措施就係經濟差時繼續有足夠收入,確保樓市見底,睇得見,同時都買得到。

高明
http://www.facebook.com/bigricetea
本欄逢周一刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載