› 選擇地區
三藩市
紐約
洛杉磯
其他美國地區
香港 台灣 北美
 
2016年05月30日

一周兩件:谷底銀證有優勢 - 錢雋

銀證在內地有356間證券營業部,廣東省就佔咗66家。 資料圖片

銀河證券(6881)潛喺一年底部,預測PB,已經係內券最平。而呢期個場再炒「深港通」,同A股納入MSCI,有消息面跟尾,銀證有得諗吓。
銀河證券由上年5月份跟中港股市大插水,現價6.49元累積跌咗54%,場內專業預估該行今、明兩年分別有0.87倍同0.8倍PB,比起上市以嚟平均1.36倍PB,平咗41%。
而行家廣發證券(1776)今、明兩年專業預估1.4倍同1.28倍PB、中信證券(6030)1.1倍同1倍、海通證券(6837)1倍同0.9倍,中州證券(1375)0.97倍同1.03倍,銀河證券PB值平霸。
中港股市上年上半年超級瘋牛,今年回歸正常,所以,同其他內券一樣,銀河證券今年成績單倒退,已經係預料之內。但咁睇,場內專業評估,銀河證券喺呢個殘價,今年都係得7.9倍預測PE,比起該行上市以嚟平均11倍PE,平咗近30%。

上邊的行家中,廣發證券今年預測12倍PE、中信證券同海通證券都係9.5倍PE,銀河證券係繼中州證券(預測6倍PE)之後,場內另一至平的選擇。再講,銀河證券喺內地擁有356間證券營業部,當中廣東省就佔咗66家。呢期場內再傳「深港通」就快會開波,而喺檢討時,兼會擴容加入小型股。諗到係,銀河證券有一定的地區優勢,加埋「深港通」若果真的擴容,便可以提高北水散戶的興趣,銀河證券一樣係有着數。
由今年4月份以嚟,就有七間大行報告,畀銀河證券平均目標價8.8元,銀河證券現價要升36%。保守少少,呢轉當短打銀河證券,博「深港通」出爐,只係追番上中信證券同海通證券今年預測9.5倍PE的水位,銀河證券都講緊要升20%去到7.8元。

錢雋
細價股專家
本欄逢周一、三刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載