› 選擇地區
三藩市
紐約
洛杉磯
其他美國地區
香港 台灣 北美
 
2016年05月31日

中環在線:金勞詹買斷《香江怒看》
若選立會 擬放fb宣傳 - 李華華

詹培忠當年的《香江怒看》是亞視少有的自家製節目。 互聯網

有「潮州怒漢」之稱嘅詹培忠兩年前義助亞視,拍住資深傳媒人衅簡寧主持時事節目《香江怒看》,更加係王征年代嘅亞視少有自家製節目之一,唔講你唔知,原來金勞詹為免自己嘅節目被人賣嚟賣去,之前索性用幾十萬同亞視買晒《香江怒看》嘅版權,仲準備一旦落實參選9月立法會選舉時放上facebook做宣傳㖭。
是咁的,有人同華華報料,話金勞詹之前喺一個飯局上自爆用咗50萬同亞視買番《香江怒看》嘅版權,噚日打畀佢求證,金勞詹就話已經係亞視執笠(應該指停播)之前嘅事,計落都係一年半載前,佢見亞視當時有經濟困難,當係施捨畀亞視,實際幾多錢佢就無講,只話係一百幾十萬咁上下啦。

自編自演 無收亞視錢

金勞詹講起,當年做《香江怒看》除咗無收過一蚊,嗰陣嘅節目內容多數係佢老人家度出嚟,講得上係自編自導自演咁話。
華華記得當年金勞詹喺節目中鬧人都幾有火,咁究竟佢買番個版權返嚟有乜大計先,直認有意出選立會嘅金勞詹話,一旦落實參選,到時需要好多唔同途徑宣傳,會考慮將節目放上facebook做宣傳。問他落實咗選邊區未?佢就話最快下星期有公佈,叫華華唔使心急。之前港視(1137)主席王維基公佈考慮參選,同樣話考慮出選港島區,咁咪隨時上演金勞詹火併魔童?金勞詹就話同邊個選埋同一區都無所謂,最重要係提供多個選擇畀市民做決定。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載