› 選擇地區
三藩市
紐約
洛杉磯
其他美國地區
香港 台灣 北美
 
2016年06月03日

樂香園:A股「入摩」無着數 - 海迪

有大行估計如A股納入MSCI,所刺激的買盤應有限。

去年今日,市場熱烈討論MSCI會否把A股納入新興市場指數,一眾Buy-side展開激烈暗戰,唔夠QFII(合格境外機構投資者)quota、追唔到貨的當然力主唔入,而一早坐晒貨的就打鑼打鼓為A股吶喊助威。一年後,這爭論重來一次,顯得有點例行公事。高盛估A股「入摩」機會達70%,大摩就話一半一半(廢話),瑞信則認為納入機會只有10%(但同時又弔詭地繼續貼股),其實都係各為其主,聽下就算。
為增A股獲納入的勝算,滬深兩地交易所上星期公佈新指引,打擊「忽悠式」停牌,希望阻止有人濫用停牌機制,真係喊賊捉賊。芬佬朋友說:「畀你呃一次係我唔好彩,畀你呃第二次就係我蠢啦!𠵱家唔係你有無法規去執行的問題,而係大陸根本視法規如無物,呢種做嘢方法先係問題。你一話有『國家任務』就可以隨時落閘,你推100條指引有咩用?得一個方法,等大家唔記得囉。」
的確,市場係好善忘嘅,如果你有錢搵的話。只可惜觀乎目前A股估值(相信無人覺得係平)、中國經濟情況(債務風險升溫),以及人民幣貶值(最近又開始開波),呢一刻睇唔到國際投資者會對A股入摩有幾興奮。提醒返,目前大行估計,如A股獲納入MSCI新興市場指數,所刺激的買盤唔會多過1,300億元,相當於目前A股整體市值0.2%。

海迪

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載