› 選擇地區
三藩市
紐約
洛杉磯
其他美國地區
香港 台灣 北美
 
2016年06月20日

財經評論:大學生最想做邊間?

每年「MT」招聘期, 都有大批準畢業生上網做資料搜集。 資料圖片

家陣間間公司都講究企業形象,不過大灑金錢落完一輪廣告之後,市民同求職者點諗係另一回事。客觀啲,仿效梁啟智,向Google大神問吓10間基本上市民都應噏得出名既發展商,由關聯詞睇吓大家對佢哋有乜印象。
方法:打開Chrome用無痕式視窗上Google香港,輸入10間發展商簡稱,再撳space,咁就會出到10個聯想結果。
(1)咁大部份發展商都會有一半左右嘅聯想字係同旗下樓盤名、有樓盤推售的地區之類嘅地產嘢扯上關係。呢個結果對路,始終準買家同地產代理買樓前總要做資料搜查,關聯詞的排名自然越推越高。
(2)不過,新世界(017)及恒隆(101)關於招聘的聯想詞多於地產領域,尤其是大學畢業生爭崩頭的「MT」(management trainee、即管理人員訓練計劃或見習行政人員)位置相當靠前,相信是年初MT招聘時大批準畢業生見工前做準備,將相關字眼推前排名。特別是新世界10個聯想結果裡唔見任何樓盤名,反而關於星光大道的爭議榜上有名。
(3)嘉里(683)與「MT」的聯想結果排名亦同樣靠前,但出奇地,嘉里與高登扯上關係,是10間發展商唯一一間。睇吓「嘉里+高登」搜查結果,主要圍繞嘉里物流(636)與嘉里就業前景。個人推斷係師兄姐向後輩傳授求職方向時,提醒畢業生申請MT前要分清楚兩間公司,千祈唔好申請錯,講嗰時拋低一句「唔明就自己上高登睇吓!」
(4)同樣設有MT計劃多年的新地(016),改以新鴻基作搜查便會出現關聯詞招聘(第2)、intern(第8)及MT(第10)。
(5)出乎意料,與新世界、新地一樣位列本港五大老牌發展商的信置(083)亦有設MT計劃,關聯詞之內卻不包括MT,唔通大學生竟將信置睇低一線?
(6)收租王恒隆雖然響發展商之間算低調,但其MT計劃看來在大學生之間有相當名氣,不過,相信部份同學申請前將恒隆與恒地(012)混淆。
(7)只有三個揸盤人(負責新盤銷售的高層/操盤手)與發展商的聯想結果靠前,分別係新地雷霆、信置田兆源及嘉華(173)溫偉明,三者的共通點之一是推盤時招開的記者會密集程度驚人,其中一人今年的經典之作是某日一小時內特意在兩個地方為兩個樓盤舉行兩個獨立記招。
(8)長實(1113)今年年初用百萬年薪招聘中文主任嘅事相當震撼網民。
(9)恒地古洞收地一事受關注程度高於公司業績同旗下樓盤,關聯詞之中亦無任何求職相關。
(10)嘉華、會德豐(020)同華懋的聯想結果中不約而同出現「樓」同「質素」,睇黎市民對呢三間中小型發展商起樓質素抱有疑問。

記者:陳東陽

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載