› 選擇地區
三藩市
紐約
洛杉磯
其他美國地區
香港 台灣 北美
 
2016年06月21日

七級偽術:最怕改壞名 - 彭瑪莉

政府建議的新政策叫「優質的士」服務,如有諷刺現有的士服務不濟,辣㷫業界。 資料圖片

傳統智慧好少錯㗎。應該係,除非唔係。
星期日坐的士,口多多同司機聊兩句,點知此君口一開,全程未停過,本來已經心煩意亂的Mary,被迫聽了幾車苦水,後悔不已。
煩就煩啲,但也不是全無得着,起碼司機大哥全程仔細分析了建議中的「優質的士」服務對現行的士的不公平,Mary都算學到嘢。
推冧牌價這些利益問題且別說,司機阿哥就不明白新專營權何以可暫免牌費,佢話邊有咁唔公平嘅競爭喎。
的士業界事Mary所知有限,但就真正認同建議中的新政策確是改壞名,新服務叫「優質」,擺明一巴摑落現有的的士行業,咁即係話我哋係「廢柴的士」啦,司機大哥怒爆大罵。

唉,事實上,此建議一出,甚麼「低級的士」、「劣質的士」、「垃圾的士」之類名稱,層出不窮,簡直一句辣㷫全行,咁九流嘅公關手法,仲點去engage stakeholder?
坦白說,的士司機真的良莠不齊,失望例子罄竹難書,拒載、態度惡劣、唔高興係咁chok車整蠱你、係唔係都叫人行西隧……大家都遇不少。甚至乘客今天已有默契,車上拾到甚麼手機iPad,都寧願帶落車報案,以免成為貪婪司機的外快。
但好心地、專業、態度一流、坐22蚊車一樣笑騎騎的快樂司機,Mary也見好多。咁樣一竹篙打一船人,難怪業界反感。
走過七、八、九十年代的香港人有時好難明,點解成個社會都好似跌咗watt,以前啲官,斷估不會犯這種低級錯誤,把一個打開名已足夠分化社會的新政策出台,當年綠van都係叫專線小巴啫,好難避免矛盾咩?

彭瑪莉
mailto:marypang2015@gmail.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載