› 選擇地區
三藩市
紐約
洛杉磯
其他美國地區
香港 台灣 北美
 
2016年06月23日

操盤手札記:把握機遇搵銀髮股 - 割柑人

今日係英國脫歐公投大日子,約本港時間明日中午先有結果,現時環球投資者嘅基本策略係等運到!上周四,支持留歐嘅英國議員被支持脫歐嘅極端分子槍殺,民情180度扭轉,留歐派反超前,連20間英超球會都全數挺留歐!博彩公司嘅脫歐賠率,一夜之間由1賠2.6上調到1賠3.4;留歐賠率則由1賠1.6下調到1賠1.4。
港股跟隨外圍股市連升四日,昨更有深港通系統測試消息,恒指殺上126點或0.6%,收20795點,若英國留歐,有望挑戰4月高位21654點。不過,一來大市四日累升近760點或3.8%,二來成交一直唔多,反映投資者未敢全情投入,公投結果揭盅前可能出現減磅套利兼避險嘅情況;揭盅後,亦可能出現當好消息落實時散貨嘅情況,100天線(現處20210)料有較大支持。

呢兩日,聯儲局主席耶倫出席參眾兩院聽證會,話經濟前景仍存相當不確定性,可能令消費及投資減少,生產力增長緩慢或持續,拖累收入增長,暗示短期內加息機會微。其實,耶倫上周議息會後聲明,先首次提及生產力增長緩慢,以及美國以至全球人口老化,係維持低息嘅考慮因素。
耶倫講呢啲?係呀!佢講人口老化呀!仲唔快啲睇下有乜銀髮族相關股份,把握投資機遇!現時市場上嘅銀髮股主要涉及醫療、保健、養老、復康,以至墓園等,我嘅心水係同仁堂科技(1666)。同仁堂係中藥老字號,產銷超過400種產品,最出名係安宮牛黃丸,被視為中風聖藥,一粒要近800元,銀髮族梗有一粒看門口。
公司亦好重視女性市場,去年以電子商務營銷模式,喺亞馬遜商城及1號店開設同仁堂化妝品旗艦店。今年3月尾,又收購同仁堂第二中醫醫院全部股權。公司持股38.05%嘅同仁堂國藥(8138),不斷進軍海外,已於18個國家及地區插旗。公司首季多賺14.5%,手頭淨現金超過15億元人民幣,相當於市值兩成,估值吸引。

割柑人
本欄逢周四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載