› 選擇地區
三藩市
紐約
洛杉磯
其他美國地區
香港 台灣 北美
 
2016年06月27日

笑到最後:
公投一役「莊殺閒」 - 高明

英國兩大博彩公司押注金額顯示,近80%資金是押注留歐。 資料圖片

英國脫歐,用足球評述員黃興桂嘅語言,一係脫,一係唔脫,其實冇乜咁大不了,不過事前吹留歐機會,吹七至九成機會留歐,到投票時原來都係「五五波」,留歐派仲要輸埋,主要係賠率令留歐成為大熱,背後莊家推手,令大家信賠率多過信民調,再一次見證「莊家贏開巷,散戶慘被劏」。
兩大博彩公司Ladbrokes及William Hill押注金額顯示,近80%資金均是押注留歐,有報道指,大額注碼都係留歐,最大注碼達10萬鎊,反而賭脫歐多數雞仔注,市場估計,英國脫歐公投彩池逾百億美元,大熱嘅留歐通殺。
賠率越熱越買,同股票越升越多人跟一樣。一開始,兩邊賠率接近,雖然留歐仍然係較熱,但未至於一面倒。隨之而嚟嘅係越嚟越多人相信賠率,然後落注,令到賠率變熱,留歐及脫歐去到1賠0.25及1賠3,有部份更高,營造咗留歐嘅「民意基礎」,仲提出埋八成機會率留歐嘅soundbite。

稍有賭博經驗嘅人,都知莊家最信唔過,賠率成日都會有「價值陷阱」。例如,本地賭波界近月對1.4倍賠率嘅球賽有戒心,見馬會開1.4倍,寧願避一避。不過,公投脫歐次數少,第一,引咗好多新手散戶入場;第二,就連賭開嘅人都冇路捉,可信嘅工具只有民調同賠率。親歐工黨議員Jo Cox被殺令民調停止,令到賠率成為唯一工具。
本來成個局只限於博彩市場,點知原來全世界都係睇住賠率做嘢,令英鎊升,環球股市反彈,全球投機氣氛令你以為留歐贏硬,更多人喺唔同地方入局,呢樣應該同博彩莊家無關,可能係運氣,亦可能係其他莊家順勢而行。
每次有大規模嘅「莊殺閒」活動,大都離唔開以下元素:一,大量散戶參與;二,資產價格越升越買;三,散戶對莊家言論深信不疑。下次遇到同類事件,檢視吓呢三個特徵,趁佢炒高好食糊囉!

高明
http://www.fb.com/bigricetea
本欄逢周一刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載