› 選擇地區
三藩市
紐約
洛杉磯
其他美國地區
香港 台灣 北美
 
2016年06月27日

中環人潮食:
荃灣牛肉佬中環開麵館

香港地,以牛肉做主題嘅餐廳,多數以日本和牛、美國或澳洲牛作招徠,有幾可話食本地黃牛,偏偏早兩個月,中環歌賦街新開一間「麵三館」,主打本地黃牛湯麵,老闆之一係荃灣三昌牛肉東主韋國雄。
韋國雄每朝喺楊屋道街市賣牛肉,普通「街市佬」一名,估唔到佢同時係中環兩間餐廳嘅老闆。佢好好口,無論對住師奶或者賓賓,都笑面迎人,落足嘴頭,難怪佢檔牛肉出名貴,依然客似雲來。
其實佢多年前已經跟劉健威合作喺天后開「牛.上牛」,去中環開餐廳就係近兩年嘅事,拍檔變成品酒師王耀龍同興隆食品郭智聰,佢哋三人前年底先喺威靈頓街,開食中菜嘅「牛三館」,近月再開麵三館,兩間餐廳嘅人均消費大約100至200元。

韋國雄指,香港人就係慣食和牛、外國牛,總係覺得外國月光特別圓,其實本地黃牛夠新鮮。三昌每日從上水屠房買牛,大部份喺街市賣,小部份供應旗下餐廳,佢希望將來可以開不同類型嘅牛肉餐廳,畀多啲人認識黃牛。
華華食過麵三館嘅「至尊手切牛肉麵」(158元),韋國雄提過,牛骨湯用上100斤牛骨熬12小時而成,的確牛香撲鼻,兩款牛肉分別係牛脊與尾龍,其中一款少少韌,亦可以話有咬口,like唔like就見仁見智。
對於由荃灣去到中環,係咪想威威?韋國雄就話,主要覺得中環人接受新事物嘅能力較高。佢拍檔王耀龍補充,就算經濟差,中環人對食都有要求,100至200元一餐仍然花得起。佢哋長遠計劃將「乜三館」繼續發揚光大,打造成一個品牌。
所以話呢,生意睇你點做,翠華(1314)因自由行減少而發盈警,韋國雄諗定做中環人生意,就開完一間又一間!

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載