蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年07月04日
馬上成為壹會員

笑到最後:
領展目標價100元 - 高明

梁振英早前忽然批評領展,話「政府無意進行回購」。 資料圖片

梁振英早前接受傳媒訪問時忽然批評領展(823),口講「政府無意進行回購」,但實質應該係想用「語言偽術」,來暗示政府可以買股票嚟「罰」領展。
如果政府想買領展買到停牌私有化,第一個問題當然係錢,因為領展股票喺市場上任買任賣,一般基金增持,另一方覺得價啱,唔會令股價升幾多。但係政府買就唔同,政府一話買,就即係已有既定立場,其他領展股東知你一定要齊貨,先至可以完成到政治任務,會唔會平賣俾你?
每一個浪,都會有一隻象徵性股票,對上一個浪,就係濠賭股同騰訊(700),而後者仲未玩完。
通常呢啲浪,股價要炒到一啲整數先肯收手,例如十或者百,政府話買到私有化領展嘅話,就會成為英國脫歐後奇葩,平日捱貴租嘅商戶都會炒埋領展一份博政府收購,領展股價上100蚊並唔出奇,屆時領展市值將超過2,000億元。
一旦股價升一倍,即係股息率少咗一半,由接近4厘跌到2厘,管理層自然會有壓力去提升租金,彌補下跌嘅股息率,以向股東交代。而呢種壓力有可能嚟自潛在領展大股東嘅政府,因為政府花過千億元公帑買返嚟,唔諗住回本都冇可能補貼。即使政府係領展大股東,加租都係理性選擇。
最近領展前主席蘇兆明接受傳媒訪問時話,喺佢任內9年,商戶嘅租金同生意嘅比率維持不變,意思係商戶生意同租金同步上升,用這一點嚟為領展冇揸壓商戶辯解。如果政府溢價入市,唔理政府管理效率係點,唔想補貼就要加租,但政府冇創新意念幫商場升級,只可以喺現有商戶生意額不變之下劏佢哋,令佢哋賺少咗。
如果唔劏商戶,就只可以劏納稅人。選票考慮,估計最後都會犧牲屬於少數嘅商戶,就算唔加租,都冇可能回到過去嘅租金。

高明
http://fb.com/bigricetea
本欄逢周一刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載