蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年07月26日

大棋局:日圓賭命式實驗(二) - Mr. Tregunter

雖然日本無法直升機撒錢,但日本央行已退路無多。 資料圖片

嚟緊嘅星期五(29日)日本央行會議,究竟會唔會有大招推出?雖然黑田東彥話現行法律下日本無法直升機撒錢,但日本央行已退路無多,再QE遲早買晒日本資產,安倍經濟學要玩落去,唯一出路係跳出現有框架。
上期提及,二十年代末日本財相井上準之助決意用通縮醫治經濟蕭條,分三步進行:大量企業半生不死係蕭條主因,所以第一步要復行金本位。當銀紙購買力上升,物價會跌,藉住通縮環境嚟一次淘汰賽係第二步。物價跌出口有競爭力,第三步由刺激出口重新挽救經濟。但事情同佢嘅預計,剛好調轉。
時值歐美經濟大蕭條,需求插水。日圓復行金本位滙價大升,日本貨雖然平咗,計埋滙水反而貴咗。井上計劃全盤失敗,1932年井上雖已落台仍被暗殺,輪到日本QE之父高橋是清出場。

高橋是清一上台就取消金本位令日圓大貶,再實行直升機撒錢。佢要日本央行直接買日本國債,重點在「直接」兩個字。因QE係買二級市場債券,即買已發行的。直接買債則更無中生有,其實就係鑑粗印錢紙。1934年日本出口額比高橋上任前增加一倍,1935年日本取代英國成為全球最大紡織品出口國。如果按圖驥咁睇數據,日本係全球大蕭條中最早復蘇嘅國家,但當時日本已侵佔中國東北。究竟係高橋新政有效定搶嘢有效,永遠係一個迷。
日本經濟有起息之際,惡性通脹亦開始反噬。高橋想稍為收緊財政,尤其想縮減軍費,但覆水難收。1936年2月26日,120名近衛步兵殺向高橋府,高橋是清落得與井上準之助同樣的命運。兩任財相喺全球經濟大混亂期間以賭命嘅方法試驗經濟學家侃侃而談嘅理論,而結果係要賠命。
三十年代中期全球不約而同出現經濟復蘇迹象,不過都係曇花一現。高橋是清死後不久,第二次世界大戰爆發。由軍人話畀經濟學家聽,貨幣政策無法逃避循環,生死先係定律。

Mr. Tregunter
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載