› 選擇地區
三藩市
紐約
洛杉磯
其他美國地區
香港 台灣 北美
 
2016年07月27日

中環在線:
長和樓神嫌小精靈阻住晒 - 李華華

趙國雄

Pokémon Go喺香港一推出即掀起熱潮,無論大人細路、明星、議員都化身為小精靈訓練員,不過唔係人人都鍾意小精靈喎,好似長和地產(1113)「樓神」趙國雄,佢一講起小精靈就變嬲嬲豬,鬧人阻住晒!
趙國雄噚日出席活動被人問到旗下商場會唔會做promotion方便市民捉精靈,佢竟然即刻say no,仲呻咗一輪。話說樓神平日多數坐私家車出入,周一走去坐港鐵,喺尖沙嘴站遇到好𤷪嘅經歷,「有人掛住玩,慢慢行阻住晒,想過佢頭,又突然停咗喺度,搞到差啲撞到我!」睇嚟樓神似係趕時間過海先搭港鐵,俾人阻住搞到佢嬲嬲豬。
至於會唔會搞promotion,佢就認為搞唔搞啲人都會嚟商場捉精靈,即使人流增加,啲人都只係掛住玩,唔會消費,「商場最緊要消費,人流多咗,唔買嘢都冇用,仲會阻住商場做生意」。佢反而考慮喺商場放告示牌,叫人唔好掛住玩Pokémon Go呀。
另一大地產商就唔係咁睇嘞,新地(016)旗下觀塘apm就派出商場保安人員充當大使,溫馨提示訓練員捉精靈時要注意安全。
新地「樓神」雷霆笑住話,雖然自己冇玩,但屋企人玩緊。新地代理助理總經理胡致遠順便sell樓盤,話如果喺元朗Grand YOHO發現小精靈一定會通知大家。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載