› 選擇地區
三藩市
紐約
洛杉磯
其他美國地區
香港 台灣 北美
 
2016年07月28日

財金冒險號:
為狂人當選做準備 - 笑笑生

特朗普曾狠批聯儲局主席耶倫主張加息。 資料圖片

小生於4月15日開欄之作,推測今年有四大驚奇,其一「聯儲局6月加息」估錯咗;其二「歐洲再遭恐襲,英國脫歐」經已應驗;其三「美國亦爆恐襲,特朗普當選總統」亦越來越大機會成真。
CNN最新民意調查顯示,特朗普支持率反超希拉莉五個百分點。睇賠率,希拉莉1.75倍,特朗普2.55倍,仍然甚冷。但經過英國脫歐一役,邊個仲敢只睇賠率、唔信民調?

距離美國大選還有三個幾月,係時候為黑馬當選做好準備。特朗普做總統對市場有何影響,市場共識係佢會實行保護主義,打擊全球貿易。首當其衝的,一定係航運及航空股。另一點近乎共識,認為特朗普係黑天鵝,係市場一大風險。諗真啲,呢個「狂人」當選,真係咁差?定係會造就如英國公投後的低吸良機?
市場最關心貨幣政策,特朗普曾狠批聯儲局主席耶倫主張加息,上台後會踢走耶倫,繼續實行超低利率。財政方面,佢講明要花錢於軍隊及基建,相信會繼承共和黨總統風格,做大花筒,等民主黨上場才減債執手尾。貨幣加財政寬鬆,結果會係美元轉弱。近幾個美元周期,升勢大約維持六年,此輪升浪始於2011年,強勢應到2017年為止,特朗普上台會係轉捩點;而弱美元,對港股是福不是禍。唔係叫你𠵱家買,係等特朗普變成所謂「黑天鵝」至出手執平貨。

笑笑生
mailto:sneeringman@gmail.com
本欄逢周四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載