› 選擇地區
三藩市
紐約
洛杉磯
其他美國地區
香港 台灣 北美
 
2016年07月28日

操盤手札記:
血色「去槓桿」重臨 - 割柑人

技術走勢上,恒指短線料整固。 資料圖片

今日期指結算,撞正外圍議息,又係大龍鳳嘅日子!繼上周歐洲央行議息後,本周輪到美國、日本,前者議息結果本港時間今日凌晨2時揭曉,後者則於明日中午揭盅。近日市場擔心儲局由鴿轉鷹,加上日本出招規模越傳越亂,時縮時擴,市場情緒相對審慎。
內地股市昨日11點突然受驚跳水,拖低港股。市場主流猜測係《21世紀經濟報道》爆料,史上最嚴銀行理財監管新規就快出台所致。另外,政治局前日開會,罕見提及「抑制資產泡沫」,估計係為10月六中全會放風。舊年血色去槓桿、擠泡沬,股災餘悸未過,又嚟?
貨幣政策進一步寬鬆無望,滬指昨跌58點或1.9%,收2992;恒指尾市拗腰,升89點或0.4%,收22218。港股雖然連升三日,但冇乜力水,後市要睇第二季及上半年業績係咪配合。技術走勢上,恒指短線料整固,只要唔失守21654前浪頂支持,仍反覆向好。

法國遭恐襲,德國更一周四宗,受衝擊嘅唔只係國家安全及難民政策,甚至影響總理默克爾仕途。黑天鵝威脅已成國際秩序新常態,今年英國脫歐、特朗普可能成為美國總統;明年德國大選,默克爾隨時下台,或成下一隻黑天鵝。中外迷霧重重,港股處於今年高峯,現時追入藍籌風險偏高,吼區間運行股份較穩陣,尤其盈喜股。
國務院早前提出,要「部署促進通用航空業發展,以改革創新擴大有效內需」,同時提到要「穩步擴大低空空域開放,簡化通用航空飛行任務審批備案」。現時內地通航機隊約2,000架,估計未來5至10年至少提升到1萬至2萬架。
中國飛機租賃(1848)係中國最大獨立飛機出租商,內地市場佔有率約30%至40%,業務亦已擴至全球各地,客戶包括亞洲一級航空公司。月初發盈喜,預告中期純利較去年同期倍增。單睇呢個牌面,已值得候低吸納。該股現沿升軌反彈,昨收8.48元,升3.2%,可小注試探,先睇9.1元,穿8.1元止蝕。

割柑人
本欄逢周四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載