› 選擇地區
三藩市
紐約
洛杉磯
其他美國地區
香港 台灣 北美
 
2016年08月04日

中環在線:莊偉忠嘆選舉權一人決定 - 李華華

「不開會的CEO」莊偉忠本月開始去康宏金融做行政總裁(CEO),敢言本色不減,對梁天琦被拒參選立法會、練乙錚被《信報》撤欄、財爺做特首等全部盡情發表意見,唔怕得罪人。
莊偉忠噚日轉工後首度見傳媒,講到梁天琦參選立法會被拒入閘,佢批評政府「冇清晰guideline(指引)就純粹落決定,唔係我哋過往值得驕傲嘅程序公義」。
佢話大家擁有被選擇嘅權利,「冇市場嘅,就自然冇市場」,政府唔應該喺門檻上一刀切。既然梁天琦已簽署擁護《基本法》聲明確認書,佢批評「有啲人唔填又OK,有啲填咗又唔OK」,最後係由「一個人(選舉主任)決定就OK!」佢估計,未來肯定有人就梁天琦事件,去挑戰選委會決定。提到時事評論員練乙錚被《信報》撤欄,佢就大嘆可惜,話自己好鍾意好鍾意對方嘅文章,成件事應該有更好嘅方法處理。
講到尾,港人最想換特首,財爺曾俊華最近表態話考慮參選,莊偉忠好興奮咁話,自己一向支持財爺,因為喺咁多個官員中,未聽過佢講一句難聽說話。而且財爺尊重運動員,莊偉忠年輕時亦係運動員,指運動對人嘅事業、人生同社會都有激勵作用,好似拳擊選手神奇小子曹星如,就令更多人鍾意香港。梁振英就話過宗教同運動界對經濟冇貢獻,莊偉忠當然支持財爺啦。

李華華
mailto:LiWaWa@AppleDaily.com

相關新聞:中環在線:莊偉忠懶理「魚蝦蟹」

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載