› 選擇地區
三藩市
紐約
洛杉磯
其他美國地區
香港 台灣 北美
 
2016年08月05日

自成一格:做外賣仔會發達! - 越野兔

現時香港主要有兩間外賣公司,分別係熊貓先生Foodpanda,以及袋鼠先生Deliveroo。

香港夏天天氣真係好難頂!一係又熱又焗,一係橫風橫雨,搞到街都唔想落,但留在家中又會餓死,又唔想叫麥麥送同茶餐廳……最近見到有外賣公司寄咗張傳單,終於試咗第一次用App叫外賣喇!用App揀好食乜嘢之後直接畀埋錢。雖然寫明要32分鐘先送到,實際時間只需20分鐘左右,送貨哥哥着住制服奉上靚紙袋,拎到嚟仲熱辣辣,足不出戶有好西食,正!
其實現時香港主要有兩間外賣公司,分別係2014年抵港、來自德國的熊貓先生Foodpanda,以及去年底才加入的後起之秀英國袋鼠先生Deliveroo,兩者營運方式大同小異。
Foodpanda主要收商家錢,所以部份餐廳外賣價錢會貴過堂食,不過唔會額外收運送費用,又可以揀貨到付款、PayPal或網上付款。而Deliveroo就收晒商家顧客兩邊錢,食物定價大多與堂食一樣,不過要收送餐服務費,定單超過120蚊會收番你20蚊,同埋只可以用信用卡網上付款。
至於餐廳數目方面,越野兔住筲箕灣,Foodpanda搞咗兩年都淨係得兩間餐廳揀,仲要由鰂魚涌送過黎,起碼成個鐘喎……Deliveroo反而覆蓋到好多平民地道餐廳,例如東大街嘅民聲冰室、甚至泰國菜、甜品糖水都有,有得揀先係老闆,等佢送上門仲快過落街買外賣!不過,餐廳多寡都係視乎地區,又唔能夠一概而論。
近年Startup的外賣公司吸金力非常強,Foodpanda於2012年創辦至今,已經經過幾輪融資,籌集到超過3.1億美元;而Deliveroo由2013年至今亦已經獲得四輪融資,合共吸金近2億美元。其實美國已經有一間外賣公司Grubhub成功上市,市值逾32億美元;所以話,今時今日做外賣仔都有機會發圍,睇吓未來係袋鼠跑得快啲,抑或熊貓戰鬥力強啲喇!

越野兔
https://www.facebook.com/Sailorrabbit/
本欄逢周五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載