› 選擇地區
三藩市
紐約
洛杉磯
其他美國地區
香港 台灣 北美
 
2016年08月05日

中環在線:
「英倫風」林鄭仔加盟小米 - 李華華

除咗富二代、星二代多人留意,近期香港嘅官二代一舉一動都備受注目,今期《壹週刊》報道,有機會出閘選特首嘅林鄭月娥大公子林節思(Jeremy,圖)啱啱加盟咗強國嘅手機公司小米做營運經理,聽聞Jeremy負責軟件開發,佢返工頭幾日仲send咗封自我介紹同自己張靚仔相畀公司國際部同事,講吓自己點解叫節思,同埋「第一次」獻畀小米嘅經過。
據Jeremy自我介紹,佢13歲去咗英國寄宿,跟住入咗劍橋讀數學,喺英國生活咗9年,所以「作風和談吐難免有點偏英倫風」,叫小米同事包容吓。佢又提到自己叫節思,係因為父母想佢每逢佳節倍思親,真係用心良苦,但Jeremy冇提及媽咪係香港政務司司長。
Jeremy都有分享佢啲興趣,包括收集黑膠碟、睇戲、寫影評、攝影、寫作同打乒乓波咁,仲話如果同事有珍藏嘅黑膠碟想出售,歡迎同佢私下傾咁話喎。
Jeremy又不忘賣口乖,話自己「第一次」獻咗畀小米,佢話自己以前一直抗拒新科技,又不屑啲成日掛住玩智能手機嘅人,直到2014年5月,佢有位朋友送咗部第一代紅米畀佢,自此就愛不釋手……(下刪3,000字)。睇到呢到,華華有個問題,係咪話Jeremy兩年前先開始用智能手機呢?

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載