› 選擇地區
三藩市
紐約
洛杉磯
其他美國地區
香港 台灣 北美
 
2016年08月18日

操盤手札記:
楓葉趕及搭直通車 - 割柑人

楓葉教育昨日宣佈入選恒生綜合小型股指數成份股,剛好列入深港通涵蓋的港股範圍內。 公司網頁

久候多時嘅深港通終於喺鬼節出關!話說上年元旦假期後,國務院總理李克強喺1月5日視察深圳時提出:「滬港通之後應有深港通」,於是各方着手籌備,期間經歷大時代、暴力救市、中證監換班等風浪,原本盛傳係今年七一回歸賀禮,結果食白果,望穿秋水,終於前日收市後拍板,年底正式開車!
市場炒深港通,已經炒咗幾轉,中港股市昨日表現麻麻,A股平收,港股就見趁好消息落實出貨,恒指高開低收,跌111點或0.5%,收22799;深港通頭號受惠股港交所(388)更完美示範「見光死」,低開低走,收跌4.7%。深港通公佈後已冇乜利好消息,港股大藍籌又多已派成績表,加上美國聯儲局兩位大員先後表示9月可能加息、意大利10月憲法公投、美國11月總統大選等都有一定風險,港股後市或回調,10天線(現處22542)附近料有支持。

中港兩地都有評論話深港通對港股較為有利,因為香港中小型股份嘅估值偏低,而A+H股之中,H股又普遍有折讓。不過,我認為無論滬港通抑或深港通,都係協助A股國際化,以及人民幣國際化嘅國策,香港嘅角色只係促進國際資金流入內地,對A股作用較大。
我一向無沾手A股,唔熟唔做嘛,但會留意入圍嘅港股。深港通之下嘅港股通,涵蓋恒生綜合大型股、中型股、市值50億元及以上小型股嘅指數成份股,以及A+H股。市值74億元嘅楓葉教育(1317),昨日食晏時宣佈入選恒生綜合小型股指數成份股。嘩!時間啱啱好!
楓葉年結日係8月底,睇番中期業績,多賺1.2倍。業績交到貨,估值不斷升,但早前受斬倉潮波及,股價大跌,昨日入選小型股消息一出,即扭轉跌勢,抽升7%,收5.8元。月初,管理層透露天津及武漢學校2017學年將會調高學費,天津中學新生學費增加26%。富瑞估計,平均每個學生學費加幅為4%。盈利增長有保障,又有深港通概念,楓葉真係時來運到!

割柑人
本欄逢周四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載