› 選擇地區
三藩市
紐約
洛杉磯
其他美國地區
香港 台灣 北美
 
2016年08月25日

中環在線:唐家成開腔撐上市改革 - 李華華

唐家成接受《A Plus》八月號訪問,表示新制會改善效率。 資料圖片

「知我是個無法討好的人……」將容祖兒個Key降低八度,等證監會主席唐家成唱呢首歌啦。事關佢忍足2個月,首度開腔力撐被市場彈到九彩嘅上市架構改革諮詢,仲豪言「做得監管機構,預咗唔得人鍾意。」
唔少金融界人士出面,對改革上市架構嘅諮詢十分有意見,證監會行政總裁歐達禮亦罕有喺諮詢期間解畫,兼且反擊批評意見。連財庫局局長陳家強、港交所行政總裁李小加都分別點評過,數來數去,係差唐家成,就湊齊4個監管者開枱。

「預咗唔得人鍾意」

唐家成接受香港會計師公會刊物《A Plus》八月號訪問,力撐新制會改善效率、加多兩個委員都亦非架床叠屋,又重申證監會並無新增權力。
佢退休前係會計四大行之一畢馬威(KPMG)嘅亞太區主席,喺公會個場梗係要扮friend,話自己都係核數師,好明白拖長上市申請對於行家冇着數,事關一旦單Job要推倒重來,客戶未必次次「超時補水」!
咁佢點睇市場咁大反響?「做得監管機構,就預咗唔得人鍾意。我哋需要確保市場運作正常、保護投資者,如果市場話『證監會真好,我愛證監會』,市民就會話,『等等先,證監會你有沒有做好你份工?』」
不過咁,市場反對聲音始終唔少,身兼體育學院主席嘅唐家成,今個星期六要向傅圓慧偷吓師,睇吓點用洪荒之力去擺平市場了。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載