› 選擇地區
三藩市
紐約
洛杉磯
其他美國地區
香港 台灣 北美
 
2016年08月26日

自成一格:
香港電子支付係垃圾 - 越野兔

使用Tap&Go的登記手續繁複,仲要帶多張卡先用到,有違電子支付方便的原意。 資料圖片

上個月《紐約時報》有條短片叫做「How China Is Changing Your Internet」,短片主要關於到底WeChat有幾勁。對於香港人而言,如非工作關係要與內地溝通,基本上好少用到WeChat。現時內地微信(內地版是微信,國際版是WeChat)的功能強大到「做乜都得」,除了購物付款等基本功能外,仲可以預約餐廳,點埋菜畀埋錢、叫埋車、排埋隊睇醫生……甚至乎有熱度圖顯示邊度多人流。有邊個會諗到,以前周圍左抄右抄合成的一個通訊App,會發展到一個國外科技巨頭都想抄番轉頭的萬能管家呢?
睇番香港,電子支付市場近一兩年才起步,金管局今日才正式發行首批儲值支付工具(SVF)牌照,其中只有5間公司獲發牌,包括支付寶錢包,Tap&Go拍住賞,WeChat Pay,TNG電子錢包及八達通卡,不過除咗用咗廿年嘅八達通之外,其他SVF又有幾多人用緊呢?

越野兔月中去咗個本地音樂節wow and flutter WEEKEND,大家對於香港終於有一個本地獨立樂隊的音樂節感到高興。只不過在活動開始前,大會表明場內只可用Tap&Go付款,仲要入場前預先增值,關公災難頓時出現,樂迷紛紛表示嬲豬唔想益咗香港電訊(HKT,6823),不會在場內消費。後來大會增設了現場為Tap&Go增值,以及入場後可以免費領取一張Tap&Go儲值卡,需要用幾多錢就入幾多,勉強平息怒氣。
越野兔非常期待音樂節,所以一早去了HKT門市搞咗Tap&Go,仲好乖咁入場前去7-11便利店用QR code增值定兩舊水去消費。起初都覺得好似幾方便,不過用落真係好伏。因為即使手機有NFC功能,都用唔到Tap&Go個App畀錢,要帶住登記時HKT派發的Mastercard先用到,或者一定要去csl.門市換埋張SIM卡……

電子錢包、移動支付原意就是一個電話可以畀晒錢,唔使再帶一大抽信用卡、八達通出街,好似美帝流入來的Apple Pay咁,登記信用卡後就可一拍即付,方便快捷。Tap&Go要去門市搞一輪已經好唔方便,仲要帶多張卡先用到,成件事本末倒置,咁樣點普及到?越野兔都唔奢望本地支付系統做到好似WeChat咁勁揪,但係都唔係咁垃圾吓話!
你自己睇下WeChat有幾萬能:
http://nyti.ms/2aIZ0tm

越野兔
https://www.facebook.com/Sailorrabbit/
本欄逢周五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載