› 選擇地區
三藩市
紐約
洛杉磯
其他美國地區
香港 台灣 北美
 
2016年08月26日

中環在線:
藺常念路過撐張華峰 - 李華華

張華峰揀正中午烈日當空企喺交易廣場門外派傳單。 李潤芳攝

多得證監會提出上市架構改革,令到立法會金融服務界選舉嘅花生指數得以提升。現任議員張華峰一直被人批評轉軚,知道詹劍崙、徐聯安參選之後,佢先至反對改革,好似冇顧業界利益。噚日佢落中環派傳單,竟然搵來「開心果股評人」藺常念做佈景板,幫手拉票。
但聞說散戶熟識嘅一班股評人,唔少都支持詹劍崙,點解藺Sir會走去支持張華峰㗎呢?一問之下,藺Sir好搞鬼咁話,佢噚日只係「路人甲」,咁啱中午時間經過交易廣場門外,見到張華峰咪行埋去囉。佢笑住話,同詹劍崙、張華峰都係朋友,冇話幫邊個咁話。
佢哋派傳單、影相都好快手,張華峰揀正中午烈日當空,企喺交易廣場門外派傳單,但可能怕醜,加上真係又曬又熱,現場所見,即使人來人往,張華峰都冇主動周圍派傳單,十幾分鐘,派得廿份左右,轉頭就走人了。
張華峰強調,派傳單唔係要隔空回應對手對佢嘅批評,而係想大家知道佢有為業界發聲。問佢覺得自己勝算有幾大,佢就話對自己好有信心,仲收到業界四個商會嘅多謝信,讚佢任內反映業界聲音,幫業界爭取咗唔少嘢喎。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載