› 選擇地區
三藩市
紐約
洛杉磯
其他美國地區
香港 台灣 北美
 
2016年08月31日

財經評論:
港人港地一場誤會

啟德1號首批折實最平單位492萬元。 資料圖片

當年梁特還未成為梁特之時,已好叻叻豬提出「港人港地」政策,口口聲聲要幫助港人上車,一班港豬當然嗒晒糖。及後梁特上任的確有兌現承諾,啟德發展區咁大,分兩塊「豬肉」畀你哋有乜所謂,更附送一堆煩到嘔的限制。
有限制唔緊要,最緊要係個價!中海外2013年以45.4億元高價投得,明碼實價,冇因為「港人港地」四粒字投地有discount,講緊麵粉呎價達5,427元及4,913元。至日前項目開價,你以為「港人港樓有特惠?」唔好意思,啟德1號首批折實最平果個單位要492萬元,折盡均呎1.45萬元,日前加推的單位更進取,部份兩房單位定價逾千萬,直逼九龍站豪宅造價。不過發展商無呃你,人地好坦白咁話自己個盤定價係參考九龍站、奧運站上蓋望維港嘅豪宅。

記者再問發展商認為呢個價能否幫助港人上車,中海外一句「特首無話可以合理價錢畀香港人買到,只不過係港人優先買物業」。
示範車位人龍,有!入票超額,都有!發展商寸得起,首批未開賣就加推兼加價。睇樓客話貴,平多幾千蚊呎會開心啲;更有睇樓客孫太突破盲腸,「你話港人港地呀嘛,我諗住拎住身份證有優惠,如果你同出面(其他新盤)一樣,使乜港人港地?」若再有港人港地樓盤,她回應:「唔好咁貴,真係畀優惠香港人,咁我哋先覺得有榮譽感。」
上車嘅榮譽感人人想要,「港人港地」聽落好friendly,但只怪「港人港地」個名改得太好聽,你以為係「畀港人上車的土地」,事實上係「畀(有錢)港人上車的土地」。呢個故事教訓你,做人不能「too simple,sometimes native」,特別係做香港人。

記者:陳家恩

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載