蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年09月02日

靠牛肉麵打入機場
皇璽主席:我哋唔係Sell好食

11,822

【本報訊】半新股皇璽餐飲(8300)8月初上市時,挾住「澳門幫」概念,加上股價炒高後高台跳水,輕易成為市場焦點;「賭王頭馬女婿」更成為主席王文威的代名詞。事實上,王文威落手落腳打滾餐飲業13年,經營餐飲業方面確有一手。
「我哋賣點唔係賣超級好食。」作為餐飲集團老闆,王文威竟會以「不賣美食」為定位,似乎好矛盾;然而皇璽集中火力做香港機場生意,目前已成機場最大餐廳集團,市佔率已達三成。若你曾經在出入境前在機場覓食,都會明白,快靚正醫到肚的便飯,會比精雕細琢的九大簋來得實際。「唔可以話我哋唔好食,大家樂(341)都話自己啲嘢好食㗎,但大家understand啦。做機場,我哋主要賣點係方便、價錢,我哋做大眾化,唔係做精品。」
皇璽旗下4間直接持有的食肆品牌,包括承繼其父親的「台灣牛肉麵」;以及「Nosh Caf𥌎& Bar」、「中國廚房」、「阿瑪港澳門餐廳」,的確全部走中價速食路線。此方向有一個好處,「我哋嘅出品,盡量唔會太倚賴師傅個人技術。」

王文威坦言,現時香港飲食業青黃不接,少人入行,好師傅難求,致員工成本高,「呢行師傅係可以惡過老闆,見過有行家,個師傅扭計要加人工,老闆話考慮吓先啦,咁師傅就拉隊唔做。」
餐飲業面對的困難,又何只是大廚短缺?租金亦是一大難題。「黃金地段唔好話租唔租得起,係業主根本唔會租俾食肆。」目前皇璽市區舖只有九龍城的「台灣牛肉麵」,以及特許一名獨立第三方以「台灣牛肉麵」及「中國廚房」品牌經營尖沙嘴廣東道的分店。
事實上,台灣牛肉麵早於1993年,其父已打入廣東道,結果2011年因貴租被逼搬到中港中心地庫,至2013年再搬至樓上舖。「之前諗都唔會諗喺旅遊區租。」然後隨着零售轉差,反而成為皇璽擴張的契機,他表示,現時業主「冇企得咁硬,係一個時機,令食肆重返以前未有諗過開店嘅地方。」他表示,正積極於旅遊、商業區物色舖位,主力谷起「台灣牛肉麵」品牌。

記者:倪敏慧

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載