› 選擇地區
三藩市
紐約
洛杉磯
其他美國地區
香港 台灣 北美
 
2016年09月05日

笑到最後:
點令香港再起飛? - 高明

與其支持單打獨鬥嘅新人入去改變一個議席,不如投有政黨背景嘅後生仔,如黃浩銘(左)。 資料圖片

民主選票嘅發明,只係確保用非流血手段換走唔啱心水嘅當權者,並唔包一定有得選你最鍾意嗰位。身為支持民主嘅自由市場主義者,今屆親市場嘅候選人只得一個,就係九西區嘅「大陸朱」,可惜高明唔係佢嗰區,無緣投佢一票,只可以從策略出發去選。
香港嘅積弱,源自於中國嘅富強,因為香港嘅設計,係靠對沖中國國力弱,做中間人游走於中西兩邊,喺狹縫之中取利。由清代商人胡雪巖喺香港借滙豐牽頭嘅貸款去幫清朝政府打仗;到共黨產利用香港運物資軍火,原理都係一樣。
近三十年中國崛起,直接出世界同洋人做刁,香港失去中間人地位,先失一仗;再加上中國經濟發展初期高速增長,令中國人以為自己有制度優越性,唔再放香港資本主義自由市場在眼內。

但係經濟高速增長係有盡頭,中國經濟一定會步入衰退,香港制度上嘅優越性將會幫到中國走出衰退。喺呢日出現之前,香港要維持現有制度,到中國經濟步入衰退時,就利用香港制度不同圖利。
本來高明呢一票,預留咗畀勇武派,進入議會盡情浪費議政時間,「用時間換取空間」。真正勇武派,應該可以媲美蘭桂坊醉酒洋漢,要用七、八個警察制服。可惜,勇武派個個都係書生身型,只限於口頭勇武,論體型、肌肉密度,冇可能喺議會入面搞搞震拖延時間。現存勇武派唔肯去做Gym,令人失望。
反正目標都係浪費時間、反正大家都係書生身型,我投番有往績嘅傳統泛民唔好?全靠本土派喚醒,泛民過去咁多年乜都爭取唔到,對於我等支持積極不干預嘅人嚟講,原地踏步就係最好嘅拖延時間。
因為今屆目標係選年輕人,與其支持一個單打獨鬥嘅新人入去改變一個議席,不如投有政黨背景嘅後生仔,希望佢去改變個黨,從而改變更多議席嘅投票取向。高明所屬新西區就會投名單排第一之中最年輕嘅社民連黃浩銘;超區就投民主黨嘅鄺俊宇。

高明
http://www.fb.com/bigricetea
本欄逢周一刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載