› 選擇地區
三藩市
紐約
洛杉磯
其他美國地區
香港 台灣 北美
 
2016年09月06日

中環在線:Banker都要Q嘜認證 - 李華華

梁嘉麗指,新設的銀行專業會士,可簡化現有不同的專業資格架構。 資料圖片

傳統打工仔智慧,多張沙紙傍身總係好,明年開始,銀行從業員可以統一考個「銀行專業會士」(Certified Banker)專業資格,老闆一睇,就知你咩斤兩,唔使多費唇舌解釋自己有幾勁。
銀行學會行政總裁梁嘉麗(Carrie)話,留意到唔少銀行打工仔周身刀,專業資格一大堆,但負責招聘嘅HR好多時無所適從,唔知邊個先係最適合某個職位,所以學會明年開始,會簡化現有嘅唔同專業資格架構,新設Certified Banker,從業員由入門第一級考到第三級,連同考試雜費、書簿費(買參考書)等,約2.5萬至5萬蚊左右。
過往如果你已經透過學會考取嘅銀行專業資格,唔需要重考,會自動銜接到新架構之下,互相認證。
Carrie話,本港各大銀行都有參與討論呢個新Certified Banker資格,有個別大型銀行更加商量緊點樣安排員工上堂,同埋將呢個新資格納入銀行自己嘅進修資助計劃入面,即係公司畀錢你讀書。咁都算係一種鼓勵嘅,好過冇啦。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載