蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年09月14日
馬上成為壹會員

Money Walker:
市場唔只驚加息咁簡單 - El.

今年餘下時間加一口息已係市場預期之內,市場最擔心嘅其實係成個寬鬆時代開始步向落幕。 資料圖片

一個聯儲局官員忽然鴿轉鷹,足以玩轉金融市場一、兩日,講緊嘅係上周五同本周一嘅環球股市大震盪。
屬鴿派嘅波士頓聯儲銀行行長羅森格倫(Eric Rosengren)上周五呼籲加息,激起金融市場千重浪。有分析指今次震盪並非憂慮美國今年加息與否咁簡單,畢竟加息呢樣嘢都唔係乜嘢新鮮事,今年餘下時間加一口息已係市場預期之內,市場最擔心嘅其實係更深層次嘅問題,就係全球主要央行認為經濟已OK,唔需要再靠寬鬆幣策支持,成個寬鬆時代開始步向落幕。

金融市場之所以咁驚央行唔大手放水,背後皆因大家都唔相信環球經濟有力自行繼續復蘇。不過經此一役,筆者認為儲局未來對加息一事,取態一定會更加謹慎,聯邦基金利率今個加息周期肯定冇可能重返4厘嘅歷史平均水平。
筆者中線仍睇好收息類資產,尤其是本港收息類股份,一來係因為低息環境中期應該會持續,二來內地保險公司為滿足理財產品派息要求,一定會借滬港通同深港通,南下來港掃入穩陣類收息股。不過隨住時間越來越接近年底,美國加息預期久唔久就升溫一次係意料中事,揸住息口敏感股、債券ETF同新興市場資產嘅投資者,如果唔想坐艇的話,係時候考慮分階段減持。至於長揸者,大可不理會中間上落。

El.
http://fb.com/moneywalkerhk
本欄逢周三刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載