› 選擇地區
三藩市
紐約
洛杉磯
其他美國地區
香港 台灣 北美
 
2016年09月15日

收市閒情:
最不幸的上市編號 - 千頌C

學上屆港姐冠軍麥明詩話齋,廣東話博大精深,就連上市公司編號都可以俾諧音玩殘。 資料圖片

啱啱出爐嘅港姐冠軍馮盈盈被爆facebook爆粗,政府、警察一齊鬧,本來身為港姐,有思考、唔離地可以幫自己加分,叻嘅仲可以轉危為機,博取公眾好感。不過,佢就揀咗講一句「少不更事」抹殺自己嘅過去。講得呢句同講「好天真好傻」冇分別嘅回應,證明馮盈盈喺智慧方面(美貌唔評論),一定輸畀麥明詩。
麥明詩左一句「粗口係廣東話文化」、右一句「好多說話比粗口更難聽」,完美示範咩係四両撥千斤,語言藝術就係咁。學麥明詩話齋,廣東話真係好博大精深,有幾?我唔直接答你,我用例子答。

(1)Samsung Note 7,一個「Note」加多個「7」,將一個完整嘅粗口詞組諧音,完美展現於世界人前。
結果,本來呢部Note 7,已被廣東人笑到體無完膚,點知一個唔該,Note 7都爆埋!𠵱家Samsung可以同人講:打劫?唔使用槍嘅,用Note 7就得啦!拎佢上機嘅嚴重程度,同拎炸彈差唔多。不過Samsung都醒咗呀,幫部機更新系統,限制充電量,限幾多?只係叉到六成電,提你唔好「七」。

(2)講完Note 7,講多個「67」。炒股嘅十個有九個都信邪,所以唔少公司,都會選擇捐錢畀公益金,咁就可以揀番個靚上市編號。要揀號碼嘅公司,主板捐款入場費係100萬、創板就65萬。
最邪嘅係,2009年旭光高新材料(前稱旭光資源)上市,同樣捐出100萬,千挑萬選下揀咗「67」呢個幸運數字。結果下場,就同Note 7一樣,喺2014年俾沽空機構Glaucus質疑旭光誇大銷售額九成,報告一出後,就停牌至今。更邪係,停牌前,正正跌7%。

(3)上市編號嘅故事,就一定要講埋翠華。呢間奶油豬,2012年上市捐錢揀number,要咗「1314」,當年主席仲笑笑口話:「做茶餐廳是個一生一世服務市民嘅承諾」,個上市編號寓意就係「一生一世」。
一間上市公司、一個生意佬同你講「一生一世」,如果你信,就真係「少不更事」啦。上市四年,就話想賣盤,仲要係因為股東不和。即係咁,承諾呢家嘢,做唔到就唔好講咁大,否則好似翠華鬧分手,分開後就變「一生,實死」。

(4)未講完,仲有一隻新股,呢隻股叫郵儲行!冇錯,即係今日開始招股,集資最多627億銀,隨時做「集資王」。
唔係話危言聳聽,講多次,炒股佬同賭徒一樣,都係信邪嘅。好衰唔衰,郵儲行個上市編號係「1658」,即係咩?「一路唔發」,堅唔老黎。印象中,用啲咁唔老黎上市編號嘅公司,對上一隻叫福壽園,編號1448,即係……要死?死吧。嗯……都切合公司業務。

千頌C
http://www.fb.com/winbigwok
代《趣BLOGBLOG》一周

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載