› 選擇地區
三藩市
紐約
洛杉磯
其他美國地區
香港 台灣 北美
 
2016年09月15日

操盤手札記:
險資求穩首選友邦 - 割柑人

友邦係業績好且派息穩嘅藍籌,啱晒講求穩陣嘅險資。 資料圖片

上周四傍晚,中保監發佈內地保險資金可經滬港通買賣港股,翌日港股以過千億成交突破24000關。險資南下,長遠無疑有利港股,但由於未有時間表,消息屬於短線沖喜多於實際支持。港股本周更被美國聯儲局委員玩謝,忽鷹忽鴿,加上油價急插,恒指連跌3日,3支陰燭。美國舊年12月中加息0.25厘後,今年玩咗9個月狼來了嘅心理遊戲,雖然儲局最新動靜係鴿后Lael Brainard發言,但萬一下周四凌晨議息結果揭盅係加息,美股以至港股都難逃一跌。議息之後個半月,11月8日就到美國總統選舉,又係一個關口。
對市場嚟講,比起美國大選,幾時加息相對小事!因為就算加息,都係幅度溫和,亦係反映經濟復蘇。股市最怕係不明朗因素,華爾街比較接受希拉莉當選,皆因特朗普擺明敵視華爾街,如果希拉莉選情有變,股市就濕滯。話說回頭,11月先大選,下周就議息,市場自然先行擔心加息!事實上,市場冇等埋儲局,10年期美債息率已由上周約1.5厘,隔晚升到近1﹒75厘,幾乎等同加息0.25厘。現時不妨留意國際金融股,吼位吸納。當美國利率上升,美債作為主要定息資產,國際金融股可望受惠於息差擴闊、定息資產收入提升。

本港上市嘅國際金融股中,銀行股如滙控(005)、渣打(2888)官司纏身,唔係我杯茶,我嘅心水係保險股友邦(1299)。人民幣持續貶值,引發內地人搬錢來港買保險,捍衛資產。友邦上半年新業務價值42%來自內地客,然而,內地客滲透率相對仍低,增長空間仍大。
友邦亦受惠於險資南下,險資係成熟、理性嘅機構投資者,揀股睇基本因素,睇有冇穩定收益,講求穩陣。藍籌向來係穩陣之選,以佔恒指比重計,友邦係四大藍籌之一,業績好,派息穩,啱險資脾胃。友邦由2月低位36.85元見底回升,沿大型上升通道進發,現價50.05元,作為加息受惠股及險資南下受惠股,可望上試55元。

割柑人
本欄逢周四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載