› 選擇地區
三藩市
紐約
洛杉磯
其他美國地區
香港 台灣 北美
 
2016年09月15日

中環在線:上月心臟病發
莊偉忠:返回陽間 - 李華華

都話世事無常,一田百貨前行政總裁莊偉忠今年初退休3個月,8月1日加盟康宏金融做行政總裁,諗住重出江湖,大展拳腳,點知返工冇耐就突然心臟病發,聞說佢病發時情況相常嚴重,幸好及時醫治,跨過鬼門關,目前在家休養中,暫定下星期復工。

54歲嘅莊偉忠喺上月中一個周末出事,事前毫無先兆,好在太太喺隔籬,咁啱又有舊同學可以介紹兩位心臟科醫生幫佢做手術。佢當時情況嚴重,及時做到手術,先至大步檻過。
佢噚日向公司同事發電郵話已經康復,又喺facebook po咗張趣怪碌柚相,叫大家唔使驚,「從鬼門關走番上陽間」咁話。
大家知道莊偉忠心臟病發都感到好震驚,睇佢身形算弗,說話中氣十足,加上之前小休3個月,日日瞓到自然醒,應該叉足電。不過又咁講,雖然莊偉忠唔鍾意開會,但肯定熱愛工作,據聞佢出院後喺屋企休息,都有同康宏個別主管跟進工作進度,就知佢幾上心,話唔定就係由悠閒轉為緊張mode而誘發心臟病。
近年越來越多人關注隱性心臟病,心臟病常見病徵係心跳異常、氣喘、雙腳水腫等,但隱性心臟病就冇病徵,可能因壓力或精神刺激誘發,定期檢查係唯一預防方法。
康宏最出名係員工鍾意行山、跑馬拉松,莊偉忠之前講過,4年前開始冇興趣做運動,𠵱家要跟埋同事去行山,操番弗啲喇。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載