› 選擇地區
三藩市
紐約
洛杉磯
其他美國地區
香港 台灣 北美
 
2016年10月06日

操盤手札記:
中史暗藏投資智慧 - 割柑人

教育局局長吳克儉打算將中史課程重組。 資料圖片

被外界稱為「吳得掂」的教育局局長吳克儉又有搞作,今趟係搞「史」——修訂沿用廿年嘅初中中史課程。據新聞報道,當局打算將中史重組為古代史、近世史、近代史、現代史;而秦末楚漢相爭、西漢王莽篡漢等治亂興衰內容,將會有所刪減,取而代之嘅係歷朝政治、文化、社會等發展。吓!冇咗鴻門宴、暗渡陳倉、楚河漢界呢啲故事,中學生仲會有興趣上中史堂咩?剛過去嘅學年,68,000名DSE考生中,只得6,800名選考中史,吳得掂咁搞法,恐怕人數會越來越少。其實治亂興衰唔止係歷史咁簡單,仲暗藏投資智慧!
單睇劉邦滅秦建漢,已經完美示範「雙底買入,贏得天下」!陳勝、吳廣首抄秦朝底,輸;劉邦抄二底,贏。嫌古代遠,可睇近代,國民黨首抄清朝底,共產黨抄二底,又贏。古今中外,莫不如是。

言歸正傳,內地股滙本周國慶放大假,北水休戰。由於人民幣貶值憂慮揮之不去,加上港股估值仍較A股便宜近兩成,北水南下確係越來越活躍。9月份港股通淨流入就高達589.82億元,打破舊年大時代嘅526.73億元紀錄。港股本周缺少北水,交投轉淡,但仍連升三日,昨收23788,升98點,升破上月高位展開嘅降軌阻力。下周二港股通復常,開閘放水,由於積壓購買力,北水料會再度大舉流入;加上憧憬深港通11月開通,恒指有望衝破24000關。
近日留意到一隻股份,唔止雙底,直頭三重底,就係中國水務(855)。集團主要於內地從事供水及污水處理業務,舊年多賺近五成。城鎮化係中國經濟發展大方針,安全飲用水嘅落實亦係關鍵,中央必會加大扶持,「水十條」政策亦會加快水價改革,對盈利有正面幫助。
集團早前表示,未來三至五年會進一步出售非核心業務,亦會分拆混凝土業務上市。食正國策水,兼具分拆概念,可以諗諗。睇走勢圖,呈現多個利好訊號,包括三重底、頭肩底、區域突破、三角突破。該股昨收5.23元,升1%,有力再上。

割柑人
本欄逢周四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載