› 選擇地區
三藩市
紐約
洛杉磯
其他美國地區
香港 台灣 北美
 
2016年10月12日

Money Walker:
油價掉頭反轉市場? - El.

過去兩年幾環球通縮預期之所以抬頭,國際油價走低係重要原因。 資料圖片

問到呢一刻投資市場最值得關注嘅事係乜,好多人都會答係北水南下,亦有人覺得係12月議息會議,筆者就覺得係油價。
過去兩年幾環球通縮預期之所以抬頭,除因經濟乏力外,國際油價走低亦係重要原因。油組達成減產協議後,市場憧憬非油組產油國唔使幾耐亦會同意減產。全世界一齊減產喎,油價今次仲唔調頭向上?到時唔止通縮預期KO咗,外界對各國央行不斷加大放水嘅幻想亦會大減,個投資市場一定反轉晒嚟玩。

不過回歸現實,根本冇人咁天真,奢望減產後油價會重上每桶100美元,事關𠵱家唔係單單講緊減定唔減咁簡單,仲有減幾多、減產額度點分配畀不同國家、減產協議有冇約束力等,呢啲全部都會影響到石油實際供應。產油國開一、兩次會就傾掂所有減產細節,兼且嚴格執行協議嘅成數極低。
但無論如何,沙地阿拉伯有心開會,已反映主要產油國開始頂唔順低油價,今次傾唔掂數都一定會搵機會再傾,所以油價短期內就算難以大升,亦唔會再重返大跌嘅日子。事實上,唔少市場中人講起第四季投資前景時,都提醒要留意美國通脹可能會升溫,導致加息步伐較預期快。除咗美國經濟本身唔差外,油價回升當然亦係通脹推手之一,但另一方面佢地仍然睇好高息股。

聽落好矛盾,通脹升溫下唔係拋售高息股而走去追入,但諗深一層又冇錯,一來因為大家都押注油價升得唔多,通脹高極有限,二來高息股本身有息收,買咗就算蝕價都仲可以賺息。但隨住市場對各國央行負利率同量寬憧憬減少,再加埋油價忽然翻生,不得不承認美債息已見底回升,高息股最輝煌日子落幕。

El.
http://fb.com/moneywalkerhk
本欄逢周三刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載