› 選擇地區
三藩市
紐約
洛杉磯
其他美國地區
香港 台灣 北美
 
2016年10月19日

收市閒情:
唔好做搭𨋢自私精 - 千頌C

大同其中一個概念係,「使老有所終,壯有所用,幼有所長,鰥寡孤獨廢疾者皆有所養」。 朋友Day提供

以下係「可能我個人比較挑剔系列」,本人好唔鍾意一種人,就係「搭𨋢自私精」。一堆人等𨋢,第一個人衝入去,然後行到最入,耷低頭,睇手機;第二個,一樣,行到最入發吽哣;第三個呢,行埋一個角搣手指倒刺;到第四個,一入𨋢,即俾𨋢門夾。好彩嘅,頭三個入𨋢嘅人,總會有一個幫你㩒番開𨋢門;唔好彩嘅,你就以身擋開道門。
俾𨋢門夾到最多都係少少痛,但如果第一個、第二個、就算係第三個入𨋢嘅人,肯犧牲少少,放棄睇手機、發吽哣、搣倒刺嘅機會做一陣揸𨋢人,第四個人根本唔會俾𨋢門夾到。

香港離地嘅人好多,事不關己,眼尾唔望。康橋之家前院長張健華,再次打甩性侵智障女院友官司,仲人渣到要討回訟費,之後仲辯稱「自己先係受害者」。留意番,張健華已係第二次被揭犯案!早於2002年,已涉嫌非禮兩名智障院友,之後用食物安撫,令事主口供前後矛盾,所以法庭裁定罪名不成立。到今次,再次甩身。有一樣,我唔明,兩單案相隔十幾年,中間張健華仲有做過啲咩嘢,咁大間護理中心,會真係冇人知?冇人留意?定係冇人敢講?
如果早啲有入𨋢嘅人,可能係康橋之家嘅員工、前員工、知情嘅人,唔好發吽哣,唔理唔望自己企埋一角,早啲出聲,或者2014年呢單案嘅受害人就唔會出事。香港人已經面對好多嘅唔合理,樓市嘅唔合理,3,600蚊租個床位;價值觀嘅唔合理,以為29歲買到樓就真係得到全世界;政治嘅唔合理,三權分立早已被人狠狠踐踏;如果連人格都冇埋,我唔知香港仲可以有咩留低。

根據《禮運大同篇》,「大同」係指:「大道之行也,天下為公,選賢與能,講信修睦,故人不獨親其親,不獨子其子,使老有所終,壯有所用,幼有所長,鰥寡孤獨廢疾者皆有所養;男有分,女有歸,貨惡其棄於地也不必藏於己,力惡其不出於身也不必為己,是故謀閉而不興,盜竊亂賊而不作,故外戶而不閉,是謂大同」。
大同係一個烏托邦,但香港,好似離呢兩個字越來越遠。

千頌C
http://www.fb.com/winbigwok
本欄逢周三刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載