› 選擇地區
三藩市
紐約
洛杉磯
其他美國地區
香港 台灣 北美
 
2016年11月08日

金手指:美國選舉日點炒股 - 孫柏文

留意住美國大選,特朗普贏邊啲州份而實行應對炒賣策略。 資料圖片

上周應承大家,今日孫柏文講禮拜三花旗國選舉結果日,點炒。
禮拜三點炒,有兩樣嘢要睇實。第一,邊個贏。第二,幾時知。花旗國總統選舉,係每個州嘅贏家,攞每州嘅代表票(即好似香港特首選委會係由十八區代表組成,按人口每個區議會分選委數目,而每贏一區,個候選人就贏晒該區嘅選委)。咁有啲州基本上唔使選,因某黨已經贏硬。
如炒禮拜三即日,就炒東岸結果,如特朗普贏晒賓夕法尼亞(Pennsylvania)、佛羅里達(Florida)、北卡羅來納(North Carolina)、俄亥俄(Ohio),佢就贏。而要估輸贏公佈時間,就要睇贏幾遠。因大比數的話,傳媒唔等點票,純靠票站民調宣佈輸贏。因市唔等人,新聞點宣佈就郁。以上東岸嘅州,喺香港開市前投完,不過要知結果,就要睇實。

仲有,如特朗普贏唔晒以上四州,唔好落注,雖然佢可執到其他北部州份,不過太唔明朗,一旦打後啲結果唔就,就會被慘夾。如果真係宣佈特朗普贏嗰啲州,咁又點炒呢?股票冇值博率,因香港4點收市,嗰日更絕對唔可以坐過夜,因好難估聯儲局會點,所以寧願唔賭。
不過,如果一但宣佈以上四州啲結果,特朗普每贏一個,相信金同銀就會升一棍。所以要睇實兼鬥快,一出四州中之一結果贏,就買金、銀。如果贏晒,金、銀就會學脫歐嗰次咁升,如果任何一個州輸,就係時候平倉轉現金離場。禮拜三會好考大家敏捷度,祝大家好運,天祐世界。

孫柏文
獨立股評人
http://www.fb.com/shuen
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載