› 選擇地區
三藩市
紐約
洛杉磯
其他美國地區
香港 台灣 北美
 
2016年11月08日

中環在線:新地避記者唔講釋法? - 李華華

新地主席郭炳聯(右)一向都唔講太多,通常主持完業績會就走。 資料圖片

最近香港好多大事發生,又釋法,又加辣,都唔知點解幾件政經大事要夾埋一齊發生。以往一有大事,財經界總愛搵大孖沙講兩句,畀少少投資方向大家,新地(016)班管理層可能知道今時今日講多無謂,忽然決定取消星期三股東會後嘅記者會,擺到明要避談時局啫。
新地、長實(1113)呢類大型發展商成日賣樓,好似日日見報,但其實投資者一年只得兩三次機會,知道佢哋點睇經濟、樓市走勢,咪就係「春秋二祭」兩次業績會加埋股東會囉。長實主席李嘉誠近年已取消中期業績會,公司解釋唔使見得咁密;估唔到新地最近都決定跟住做,一改慣常做法,取消股東會後記者會。
新地方面解釋話,9月先至舉行過業績會,事隔兩個月,冇乜業務上嘅新update,管理層又想多花時間照顧去股東會嘅小股東,仲有其他去開會嘅董事,所以就唔招呼傳媒嘞,由今年開始,以後股東會後都冇傳媒環節了。
消息人士強調,呢個決定並非由新地大股東郭炳聯或者郭氏第三代提出,而係由其他董事提出,大家又同意咁啫。其實郭氏以往對於樓市或社會大事嘅睇法,都講得十分保守,好多時講咗等於冇講,又使乜咁戰戰兢兢,唔通因為有人有官司在身,政府又加辣,公司寧願專心賣樓好過講咁多?

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載