› 選擇地區
三藩市
紐約
洛杉磯
其他美國地區
香港 台灣 北美
 
2016年11月09日

中環在線:兩大燈神睇好特朗普 - 李華華

財演界兩大「燈神」一齊睇好特朗普可以當選,如果真係俾佢哋估中,仲唔一洗惡名?

財演界兩大「燈神」翻身,靠晒特朗普!人稱沈大師嘅沈振盈同成日叫人一注獨贏買乜乜嘅孫柏文,一直俾人話係財經界燈神(意指經常睇錯市),無獨有偶,兩人一齊睇好共和黨總統參選人特朗普可以當選美國總統,如果真係俾佢哋估中,仲唔一洗惡名?
今屆美國總統大選特別緊張,投資者十分擔心狂人特朗普勝出,雖然話特朗普一路似做show多過選總統,加上經常有驚人言論,照正路美國人冇理由會投佢一票,但正如英國脫歐公投前,好多人都話英國人應該好理性唔會通過公投一樣,結果咪一地眼鏡碎,兼且大把人喺股市輸錢囉。
所以呢,投資者睇美國總統大選都係十五個吊桶打水,唔敢買重民主黨參選人希拉莉一定贏,孫柏文同沈大師直情係估特朗普贏㖭。
孫柏文以一貫作風話「一注獨贏特朗普」,佢話留意到啲幾十年冇投票嘅美國人唔止支持特朗普,仲要四出幫佢拉票,買特朗普贏係有一定值博率咁話。沈大師就話「子非魚,我哋唔係美國人,佢哋可能真係鍾意特朗普㗎喎」,所以都睇好佢贏。
市場一般相信,如果特朗普贏股市就會大冧,因此孫柏文叫人買定金、銀,股市跌金銀價有機會上升咁話。沈大師亦叫人趁跌市撈貨,冇有怕喎。即管睇吓兩位燈神今鋪可唔可以翻身啦。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載