› 選擇地區
三藩市
紐約
洛杉磯
其他美國地區
香港 台灣 北美
 
2016年11月15日

中環在線:唐唐億元買舖搞社團 - 李華華

唐英年

香港特首選戰鬧得沸沸揚揚,當年輸畀梁振英嘅唐英年,keep住印印腳嘆紅酒都不知幾爽。舊年佢帶頭成立香港江蘇社團總會,不時舉辦同鄉聯誼活動,早前佢代表總會買入灣仔越秀大廈一個樓上舖,打算畀總會自用。
根據土地註冊處資料顯示,灣仔越秀大廈1樓1至3室,面積合共7,237方呎,上月14號以1.03億元易手,呎價1.4萬元。新買家係「江蘇控股」,公司董事目前只得唐英年一人。
唐唐發言人回應話,呢個物業並非唐英年私人擁有,江蘇控股嘅股東數目將會增加,換言之,只係暫時由唐唐做代表。

短炒寫字樓賺逾千萬

據了解,呢個樓上舖𠵱家主要租畀一間梳化家具店,月租收入超過30萬元,應該等到租約期滿,就收番物業畀江蘇社團總會使用。
祖籍江蘇嘅唐唐舊年初發起成立江蘇社團總會,佢係創會會長。佢主要想將香港多個江蘇社團凝聚起來,形成一個更有實力嘅社團。睇番總會網頁,佢哋舉辦活動都幾頻密,呢兩個月就有品茶、嚐茅台以及常州代表交流活動。總會目前寫字樓喺西環,買入灣仔新址,舉行活動應更有彈性。
唐英年除咗搞社團之外,早前投資亦有斬獲,佢6月斥資8,300萬元,買入會展高層寫字樓單位,上月底以1.05億元沽出,扣除使費,短短4個月就火速獲利1,320萬元,肯定爽過做特首喇。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載