› 選擇地區
三藩市
紐約
洛杉磯
其他美國地區
香港 台灣 北美
 
2016年11月24日

操盤手札記:
感恩節見「基」行事 - 割柑人

中聯重科明年收入有望增三成。 資料圖片

亞太經合組織(APEC)峯會早幾日閉幕,影大合照時按國家字母排位,呢個安排比較少見,於是美國總統奧巴馬企喺後排。如果國際會議次次都按國家字母排位,咁美國總統就企硬後排,而中國國家主席則排頭位!
亞太各地喺峯會上重申支持自由貿易,反對保護主義,擺明警告特朗普!特朗普亦喺早兩日發表上台首百日大計,重點係退出《跨太平洋戰略經濟夥伴關係協定》(TPP),但就避談對華政策。特朗普係生意人,利之所在,可以講一套做一套,參選時嘅激進主張,走數唔奇。

投資者對Trumponomics無限憧憬,美股四大指數(道指、標指、納指、細價股指數Russell 2000),17年來首次連續兩日同創新高,道指更首破19000關,標指亦首破2200關。港股受帶動,連升三日後昨日早段繼續上揚,升過百點,屠熊後掉頭,百天線得而復失,U盤更倒跌1點。
其實市場未見有確實利好因素,主要動力只係憧憬深港通開車。據港交所(388)首席經濟學家巴曙松最新貼士,12月12日開車機會大。不過美國12月議息,利率期貨顯示加息機會100%,加上12月初意大利修憲公投,市場轉趨避險,下周恒指結算或會下試22000關。

今日係感恩節,標誌着聖誕購物正式開始。我循例都會鳩嗚,買乜好?見「基」行事。中、美大搞基建刺激經濟,加上特朗普揚言退出TPP,變相放生中國基建外交,一帶一路概念又再炒起。我嘅心水唔係基建股、資源股,而係基建拍檔重工設備股。
重工設備股中,中聯重科(1157)係中國最大工程機械商之一,喺行內最早轉型,上季賺3,424萬元人民幣,為2012年以來首次錄得按年增長。中金指出,該公司透過金融工具對沖外幣,控制貸款風險,料明年收入可增三成。該股現價3.34元,睇走勢圖,呈現區域突破兼三角突破利好訊號。

割柑人
本欄逢周四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載