› 選擇地區
三藩市
紐約
洛杉磯
其他美國地區
香港 台灣 北美
 
2016年12月04日

記者試食:招牌焗薯好邪惡

【本報訊】有機會訪問米芝蓮食店,試食呢個環節一定唔少得。記者在尖沙嘴訪問叁薯老闆後,便走去旺角總店試食。

相關新聞:中獎如中咒米芝蓮小店多被加租

叁薯推介的3款人氣菜式,包括重量級芝士酸忌廉焗薯(36元)、阿二焗薯(33元)及香煎煙肉洋蔥薯餅(30元),當中阿二焗薯做法最有特色,阿二的意思,即是將個薯仔焗兩次,底係半隻焗薯,上面加上大量薯蓉,夾埋就等同一隻薯仔的份量,薯蓉連薯仔本身,配埋千島醬、芝士同煙肉,坦白講,賣相已經「邪惡」,食落就更加「邪惡」。
至於重量級芝士酸忌廉焗薯,薯仔就原隻上,《蘋果》魁梧兄一個人食都覺得有點滯,應該兩個人「些牙」比較好。至於香煎煙肉洋蔥薯餅,「香」呢一部份喺煮嘅時候已經嗅到,訪問短短半小時,已經有最少兩個客人光顧此菜式。
《米芝蓮》被餐飲界視為「美食聖經」,為飲食界商戶帶來一個光環,但被提名之後,商戶更要奉上3,000大元訂造獎狀,一個米芝蓮榮譽才可以獲得「正名」。
叁薯老闆娘Vivian直言,2016年榮獲街頭小食推介後,需要用3,000元訂造獎狀,但旺角總店太細,根本無位鑲起,「一直放喺寫字樓」,要到現時尖沙嘴新店才令獎狀「重見天日」。
Vivian憶述第一次獲提名時「驚多過喜」,「其實對做生意,米芝蓮短期幫助唔大,生意額冇突然間大升,反應唔係一時三刻睇到」。不過影響是長線,至少現時有不少遊客手執指南慕名而來,包括日韓遊客,反而內地客不多。同時亦曾獲商場及PMQ邀請開短期攤位,Vivian坦言開店初期從未想過有此類機會。
Vivian強調,做生意一定要不停變,就算有獎都「唔可以一路攬住佢」,強調整體投資未回本,現階段「未贏」,未來要經營品牌,仍然有好遠的路要走。而今年再度獲米芝蓮推介,以平常心看待。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載