› 選擇地區
三藩市
紐約
洛杉磯
其他美國地區
香港 台灣 北美
 
2016年12月09日

財經評論:
認清滙價小心上當

人幣價格波動大,找換店要經常睇實,否則連成本都圍唔番。 資料圖片

人民幣近日連連貶值,現時拿着100港元紅衫魚,到找換店換取90元人民幣其實唔難,不過近排瘋傳某某找換店嘅滙率牌價,講到港元人民幣可以一兌一,其實有啲誤解。
找換店羅列嘅滙率,有分買入價同賣出價,以中環某間排隊排到去馬路嘅找換店為例,人民幣買入價係90.4,賣出價89.6。
首先講買入價,即係找換店願意用100港元,買你手上嘅90.4元人民幣。睇呢個價嘅顧客,通常係啲成手人民幣,好想將佢哋換番做港元嘅人,咁呢個價當然越低越好,可以換番多啲港元嘛。
找換店買入90.4元人民幣後,唔會長期持有,可以嘅話就即刻拆番出市面,咁佢當然唔會用成本價去拆,你畀100港元出嚟,找換店只會畀89.6元人民幣你,呢個就係賣出價,咁找換店就喺一買一賣食中間個差額,賺到0.8元人民幣咁多。

如「賣出價」遲啲上升,即每1蚊港元可換到更多人民幣,對於北上骨友係好事,最好就梗係100港元換到100元人民幣,先係「真.一兌一」。坊間嘅「假.一兌一」,就係100元人民幣可以兌到100港元呢個「買入價」。現時大部份找換店都係用90元人民幣就可以換到100港元,邊有人咁儍會去前者度兌換,但又咁講,點解間找換店要咁做?
查實人幣價格係十分之chok,經常要望實,否則連個成本價都圍唔番;同時要好好控制人幣存貨,例如找換店早前入咗一堆貴貨,仲未銷得晒,但市場預期人幣價格仲有得跌,咁就會出現問題,所以找換店就首先控制來貨價格,等人幣唔使越積越多。亦有找換店因應風險提升,將買賣差價擴闊,令整體生意量下跌,承受價格波動能力大幅提高,咁樣生意就會相對穩健好多。

記者:周家誠

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載