› 選擇地區
三藩市
紐約
洛杉磯
其他美國地區
香港 台灣 北美
 
2016年12月09日

中環在線:
碧桂園駙馬入局做非執董 - 李華華

陳翀

碧桂園(2007)老闆楊國強嘅千金楊惠妍曾經係內地女首富,佢同老公陳翀(粵音︰沖)一向低調,香港傳媒應該未見過佢哋真人。但其實陳翀早於2004年加入碧桂園,噚日正式獲委任入董事局,擔任非執行董事。

清華畢業 生化學高材生

今年34歲嘅楊惠妍一早幫爸爸打理碧桂園,佢細妹楊子瑩與堂兄楊志成亦係公司董事,家陣終於輪到佢老公。
陳翀今年38歲,畢業於名校清華大學,有化學學位,又喺倫敦大學皇家霍洛威與貝德福德學院取得生物科學研究碩士學位。雖然佢係生化學高材生,但喺碧桂園工作逾十年,做過投資拓展部經理、總裁助理同主席特別助理等。
清華企業家協會嘅網站亦有介紹呢位傑出校友,指佢全程參與碧桂園在港上市工作。楊國強亦幾信任呢位女婿,事關陳翀做過一間叫佛山市順德區創源投資有限公司董事長,唔少內地傳媒話呢間公司係楊國強進軍能源產業嘅重要棋子,由識化學嘅陳翀管理亦合理。
陳翀仲有另一個銜頭,就係國務院批准成立嘅「友成企業家扶貧基金會」理事,呢個友成基金會嘅理事位位猛人,好似發起人兼副理事長,就係毛澤東外孫女孔東梅老公陳東升,佢旗下泰康人壽早前成為蘇富比主要股東;此外,復星(656)老闆郭廣昌係基金會副理事長。
陳翀做碧桂園非執董,每年只袋37萬人仔,不過佢又點會志在呢份糧吖。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載