› 選擇地區
三藩市
紐約
洛杉磯
其他美國地區
香港 台灣 北美
 
2016年12月13日

財路:留意價殘五礦地產 - 錢雋

五礦地產係少數揸淨現金嘅內房;圖為集團董事總經理何劍波。 資料圖片

五礦地產(230)係少數揸淨現金嘅內房,而淨現金幾乎係市值一半水位,仲係超級爆殘。
五礦地產今年累升咗近44%,咪以為好勁,集團現價0.98元,都只係上番最近三年大橫行底,家陣市值都係得30億元多啲。五礦地產到今年6月尾揸134億元,係市值四倍,減埋借款之後淨現金近17億元,係市值一半水位。
集團家陣揸住香港尖咀五礦大廈同中環LKF29(前稱東方有色大廈),按報章資料,總樓面11.5萬平方呎。好保守計數,兩幢商廈呎價1.5萬元,已經值17億元。五礦集團現價總市值,只係反映到淨現金同兩幢物業價值。現價買五礦地產,係免本揸住集團總樓面3,700萬平方呎土儲,五礦地產仲係爆殘!

五礦地產對口係超級大孖沙五礦集團,資產規模超過7,000億元人仔,又唔計五礦地產發展部份,五礦集團本身可開發住宅總建築面積9,740萬平方呎。
而今年中,集團先由五礦建設改名做五礦地產,成系內地產旗艦,母系大把筍嘢注畀五礦地產。
五礦地產今年上半年盈利增長近9%,半年成績已經過關。呢個月頭集團發盈喜,預計頭十個月收入同盈利,會同比增加180%同260%。而10月中集團公佈今年頭九個月簽約銷售額,錄到72%增幅,去到101億元人仔。睇到亦諗到五礦地產銷售入賬,嚟緊日子嘅成績單,應該好靚仔。
唔好計多,五礦地產土儲,每方呎增值100蚊咁大把,集團已經額外增值37億元,連增值計,實際PB,隨時得0.27倍。數咁計,五礦地產再升44%到1.3元,目標價實際PB,都係得0.39倍,總市值得43億元,仲係奀爆!

錢雋
細價股專家
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載