› 選擇地區
三藩市
紐約
洛杉磯
其他美國地區
香港 台灣 北美
 
2016年12月14日

Money Walker:特朗普真係咁「好息」? - El.

特朗普對於加息的取態,未必如外界想像般鷹派。 資料圖片

全世界都認定本周聯儲局議息後記者會上,主席耶倫嘅言論會冇乜料到,因為出年加幾多次息,仲要視乎特朗普上台後具體經濟政策如何,喺不明朗性極高下,慎言嘅耶倫當然唔敢講啲乜。
相比之下,筆者更加留意議息後公佈嗰份儲局官員經濟同利率預測,話晒呢份係大選後首份儲局官員預測,可以綜合到儲局整體官員大選後對經濟同息口睇法嘅變化,顯示到佢哋對特朗普嘅經濟政策係咪真係咁有信心。
講起特朗普,外界一直認定佢唔鍾意低息,但事實未必係咁。上星期有「儲局線人」之稱嘅《華爾街日報》記者Jon Hilsenrath出咗篇報道,引述儲局前副主席科恩(Donald Kohn),指特朗普一方面自稱支持低息,一方面又指責儲局維持低息造就資產泡沫。呢篇報道多少反映儲局內部認為特朗普對息口真正立場極為矛盾,亦透視儲局官員認為特朗普未必如外界所想咁鷹派。
其實出年再加息幾乎已成定數,重點只係加幾多次。外界唔少分析都認為,加息太多次對特朗普政府冇乜好處。原因係佢支持美國大興土木,但增加基建會導致政府開支上升,美國國債規模最終只會因此越滾越大,如果特朗普仲執意要儲局出年再加多幾次息,只會進一步加重美國政府債務負擔,甚至有可能引起市場對美國政府財政嘅憂慮。
由於特朗普未必真係大家所諗咁好息,對於佢未來係咪必定會提名鷹派人士入聯儲局做理事或行長,筆者暫時有啲保留。

El.
http://fb.com/moneywalkerhk
本欄逢周三刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載