› 選擇地區
三藩市
紐約
洛杉磯
其他美國地區
香港 台灣 北美
 
2016年12月14日

太古廣場:如何趁Yen平爆買而不失優雅 - 關家姐

用郵寄方式將遊日戰利品寄番香港,就唔怕買得太多嘢啦。 資料圖片

Yen又跌到落6.7算,個個又即刻狗衝去日本。唔好誤會,我無諗住取笑助長日本經濟嘅朋友,係人都睇錢做人,趁Yen平飛去日本食吓壽司、買吓平藥妝用足一年,有乜嘢問題?
上次先教完Connie開張儲積分可以直接換機票酒店嘅信用卡去日本之後,個妹豬真係好瘋狂咁買咗好多嘢,日日send戰利品鋪滿一床嘅相去我哋個team WhatsApp group,當然仲因為佢幫我同媽咪秘書Priscilla買嘢啦。喂,滿足購物慾,又可以幫自己張卡儲分,唔怕辛苦其實好抵。
Connie:點算呀?我仲有兩日但係個篋已塞爆咗啦!(14:33)
Daniel:(流汗emoji)(14:33)
Priscilla:乜你帶咁細個篋去㗎!明知去日本就帶個人咁高嘅篋啦!(14:40)
Connie:唉塞得落都實超重啦,點算呀(14:45)
Daniel:咁慘?會唔會加好多錢㗎?(14:45)
大家都係女人,失控起上嚟可以好恐怖,我都明。行李超重隨時要加三幾舊水,錢都事少,日本唔係個個站都有電梯,一個女人仔要搬廿幾公斤行樓梯,你都咪話唔驚。既然都要使錢,咁why not使得優雅啲、smart啲先?
第二日Connie落咗酒店對面街個郵局,買咗個最大嘅300幾Yen嘅紙盒,再去便利店買400幾Yen牛皮膠紙。返到房同佢朋友砌完個紙箱,就開始塞啲戰利品入去。之後封番個紙箱,拜託酒店前枱幫手打去郵局話要寄嘢,約咗時間有個郵局職員上嚟,填表、畀錢,郵局職員推走箱嘢,搞掂。幾個女人買咗成15公斤嘢,寄番香港承惠500幾蚊,一星期後屋企收貨,托都唔使托。
成朝喺出面conference聽嘢,返到嚟Connie已經派緊手信。
「家姐!呢件特登買畀你㗎!」Connie隊咗成舊水嘅明太子畀我。「多謝你教路,我先唔使搬咁重嘢返嚟咋。」
「客氣啦。」我瞄一瞄Daniel,佢都有有熊本熊啷啷鎖匙扣,唔錯唔錯。
「我見tracking話我箱嘢已經飛咗喇!超快囉!」
「咁我哋放假前咪可以拎埋啲mask囉?」Priscilla又搭嗲:「你就好啦,家姐幾錫你,working hour都同你WhatsApp chat教你寄嘢。」
錫佢?Maybe啦。其實佢箱嘢有幾公斤都係我Amazon買定啲書,同埋喺Royce網上買定嘅聖誕盒裝set朱古力,寄晒去佢酒店,咁無理由要佢幫我托同埋畀行李超重費嘅……
【家姐教路】去日本郵局最平寄空郵返香港記得用SAL,寄EMS貴到你喊,寄船就等下世先收到。重量收費可以喺日本郵政個網站睇到。去到郵局啲表格會擺晒出嚟,買箱時可以拎埋番酒店房填好先。記得每樣嘢有幾多件都要填得清清楚楚,日本人做嘢認真唔是新聞,到時俾人扣關就喊都無謂啦。液體可以寄,但噴霧式嘅就諗都唔好諗,有啲郵局職員會好心拎晒出嚟幫你check,唔太重的話可以自己托去郵局運,唔使等人上門。最後,趁Yen平出發前買定晒送去酒店,可以慳番你好多時間同腳骨力。

關家姐
https://www.facebook.com/kwangajei/
本欄逢周三刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載