› 選擇地區
三藩市
紐約
洛杉磯
其他美國地區
香港 台灣 北美
 
2016年12月14日

收市閒情:改名轉運不切實際 - 千頌C

ECrent公司網頁

中國人迷信,金融界就特別迷信。唔少公司企業改名洗底,sor,改名轉運先啱。上年底曾寫過唔同上市公司改名嘅藝術,其中一個方向,就係個名一聽,就知佢係搞緊當時得令、概念最sexy嘅行業!
近年講概念,要sexy?科網囉。喂!Uber、Airbnb……隻隻市值幾百億美金;Sharing economy掂喎……好似。結果最近真係有一間上市公司,改名叫做「共享經濟集團」(1178),顧名思義到一個慌死你唔知嘅地步。間嘢本來就搞開保健食品,原本叫天年集團,之後就收購ECrent部份股權,冇錯,即係曾經話想做亞視白武士嗰間。
我唔討論ECrent創辦人,即係「二手車大王」陳天賜財金界file有幾花,只討論呢間自稱「The largest global rental platform」定位係咪出事。ECrent業務,簡單講就係,有人有嘢想放租,就放嘢上去, 範疇涵蓋之廣,係由電鑽到一間一間屋都有得租,佢收上架費!

即係咁,Airbnb、Carshare呢類專攻一種product嘅平台做得住,唔代表ECrent呢類百花齊放嘅就係行錯路、做唔住。不過當公司董事會同傳媒講,自己都有放手袋上去平台,甚至有叫同事放,原因竟係「因為平台唔夠產品」。坦白到一個點,你答我係因為你相信個理念都好吖。自問自己都係一個幾geek嘅人,做平台最緊要係講嘅係user experience;用戶介面衰,真係死罪。然後你click入去ECrent網頁,配合個勁似為世人所歧視嘅類Internat Explorer嘅logo,直頭似返咗十年前上網,可能係我主觀。再睇埋平台條宣傳片,可以講係,除咗肯定係手機拍外,仲肯定誠意欠奉。
公司近來先衰過一次「出租寵物」俾外界批評,之後就撤回推出服務。而其實只要有諗得透徹,呢場「關公災難」係好易避免。一間公司,以至一個人,冇誠意做實事都可以扮到有;但有好多時,時間有限,但要交數,就難以避免俾人睇到hea出面。
改名,可能可以轉運,但最終件事行邊條路,都係睇個餡。

千頌C
http://www.fb.com/winbigwok
本欄逢周三刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載