› 選擇地區
三藩市
紐約
洛杉磯
其他美國地區
香港 台灣 北美
 
2016年12月15日

操盤手札記:
息魔油魔反利宏利 - 割柑人

散戶不妨留意業務以北美為主的宏利。 資料圖片

距離特首選舉只剩三個半月,梁振英宣佈放棄競逐連任,特首跑馬仔開出新局面。喺沙圈踱步嘅各路人馬,除已宣佈參選嘅前法官胡國興,仲有前立法會主席曾鈺成,以及林鄭月娥、曾俊華、葉劉淑儀。行政、立法、司法界都有人落場,玩三權爭霸乎?
阿爺叮走梁振英,或者關李超人事!2012年梁以689票低票當選,令阿爺驚覺,1,200名選委中,除咗泛民205票,仲有約300票唔受控制。當中,李超人同一班商界朋友,就企硬唔肯投梁。阿爺計過條數,今屆泛民選委勢增(結果奪得326席),連同嗰300票,梁贏面好低,唯有放棄佢。李超人當年之舉,令梁今次被棄,都算係長線逆向投資,雖然坐咗四年艇。

美國議息結果,本港時間今日凌晨3時揭盅。開估之前,加息已被市場消化,道指連續七日破頂,逼近20000關,但14日RSI已升至87,20000關附近或現技術性調整。港股承接升勢,高開150點,臨尾升勢減弱,以全日最低位22456收市,升唔夠10點。恒指50日線跌穿100日線,形成死亡交叉,走勢轉弱。
近日油價飆升,亦令通脹預期上升,美國債息走高,美元走強。港元拆息連日抽高,詭異嘅係港元滙率竟然無郁,唔通金管局秘密出手捍滙?美國加息,美債作為主要定息資產,國際保險股可望受惠於定息資產收入提升,不妨留意業務以北美為主嘅宏利(945)。

宏利舊年業績報告作出嘅敏感度分析指出,若所持債券上升0.5厘,股東淨收入將增加32%。公司舊年因油價大跌,要為石油及天然氣投資作出8.8億加元撥備;不過,油價今年已回升,日前更見54.51美元年半高位,相信舊年嘅撥備有機會回撥。
宏利現價相對內涵值僅1.2倍,低於歷史平均嘅1.5倍,估值偏低。以預測市盈率計,宏利11.9倍,同業友邦(1299)18.3倍;以預測股息率計,宏利3.5厘,友邦1.6厘,宏利比友邦估值更吸引,防守力更強,可候大市回調收集。

割柑人
本欄逢周四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載