› 選擇地區
三藩市
紐約
洛杉磯
其他美國地區
香港 台灣 北美
 
2017年01月05日

鄧成波之子淡市開10酒店

【專訪】
舖王鄧成波之子鄧耀昇(Stan)在旅遊業走下坡之際,走去開10間酒店共1,800間房,規模相當於6間九龍半島酒店,有錢就是任性嗎?訪問劈頭就問呢點,80後的他淡定咁話:「我哋唔係睇咁短視,如果搞酒店集團,睇兩、三年唔掂就頂畀人,太兒戲!」圖殺出另一條生路。

相關新聞:葵涌工廈變酒店最平500蚊晚吸本地客

活化工廈辦廉價酒店

早年政府活化工廈政策,吸引舖王波叔由舖市短暫轉戰工廈,幾年前買入多幢工廈改裝,可改做酒店、寫字樓或零售,兩年前見到旅遊業風光,負責管理資產的孻仔Stan決定改做酒店,叫做幫物業升級,原本計劃翻新後出租,但反應差,心諗「人哋做,不如自己做」,結果踩隻腳落去,選擇做酒店,當時他忽發奇想:「香港房屋短缺,酒店可唔可以加快提供住宅畀市民呢?當然酒店同住宅係兩樣嘢,但係咪可以短期出租呢。就算酒店出租率唔係租爆,我哋都可以租畀市民……兩手準備,旅客得,本地客又得。」
他旗下10間酒店在目前至2018年開業,級數由2至4星,合共1,800間房間,當中1,300間房間透過工廈活化得來,今年主要3間酒店位於葵涌,合共900間房,其中一間位於葵涌酒店房價每晚平均約500元,其餘酒店分佈屯門、灣仔、油麻地等地區。以九龍半島酒店有300間房計,即相當於6間半島酒店的規模。
雖然是酒店業初哥,但心態一啲都唔似,反覺現在正是大展拳腳的時機,「我一路加人,其他集團一路減人……跌得最傷是5、6星酒店,自己行2至4星酒店路線,呢個筆直吸引到啲客,希係係呢浪,乘住咁上……之前房價太癲,好似尖沙嘴重慶大廈,一個床位,日租過千蚊,太離譜!」

唱好前景之餘,亦不諱言:「要諗多啲蹺,填滿酒店!」除了旅客,再搞本地市場,初步構思學術交流團、本地商務團,「唔係旅遊性質嗰啲,有啲公司管理層好鍾意行開幾日,去做retreat,與世隔絕一陣,我哋提供酒店房間、活動場地,令佢哋呢幾日去做個人及業務計劃;又整啲卡通火車、公主等主題房,畀香港人一家大細,唔使飛去第二個國家。」
呢一切都唔係亂噏廿四,暫時開咗兩間酒店,平均出租率逾九成,其中一間11月出租率達到100%,當中以日韓旅客為主。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載