› 選擇地區
三藩市
紐約
洛杉磯
其他美國地區
香港 台灣 北美
 
2017年01月16日

經濟客艙:要上車定要自由? - Captain Cool

沒有了富爸爸、富媽媽,新一代買樓可能真係要等一世。 資料圖片

有位慈父話:「唔買樓一日咁hea……早啲唔hea幸福就係自己。」作為冇能力買樓嘅「Generation Rent」嘅我,就反思究竟每日係咪hea住咁過。
的確喺香港呢個小城市,大人教你成功嘅定義,多過同你講點先跌得好睇,即係大學畢業、讀Master、買樓買車、嫁個有錢人等等,人生才功德圓滿。多數爸爸媽媽望子成龍、望女成鳳,多過想睇住佢哋「褲穿窿」,日日搵錢去還loan。
喺好多千禧BB未出世前,80年代初香港教育制度曾經出現過「中三淘汰試」。講呢個考試制度,中三後有同學仔分分鐘冇書讀。但喺學位量寬下,即使爭唔到第一,都有大量職訓或者其他進修出路。諗諗吓千禧世代經常俾人話好hea,講真係時代嘅錯。

同玩啤牌一樣,拎到一手好牌實贏,但𠵱家嘅新世代抽到只係一副爛牌。喺薪酬跑輸通脹同樓價增長下,即使慈父講笑都好,但講得好中,「買樓要識投胎」。如果沒有了富爸爸、富媽媽,買樓,可能要等一世。
所以,選擇咗同阿爸阿媽買樓嘅Generation Rent,係就係唔hea,但未必幸福就係自己,反而係俾層樓困死。你自己都有數得計,又唔係「堅離地」嘅中產,每月未賺夠兩萬蚊,但出糧後就進貢一半畀阿爸阿媽供樓。如果孝順點每月畀多四千蚊家用,扣扣減減食飯搭車,餐搵餐餐清。講到尾邊個世代都好,人生都係一條選擇題,唔買樓可以拎筆錢到處暢遊,換來人生不可替代嘅自由。

Captain Cool
https://www.facebook.com/seeforcaptain/
本欄逢周一刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載